Ацы аз компетенциты нымæц у 45
Цæгат Ирыстоны цæттæ кæнынц Абилимпиксы регионалон къæпхæнмæ. Уый у инвалид, æмæ йе нæниздзинад хъыгдард кæмæн у, ахæм адæмы хсæн профессионалон дæсныйады чемпионат. Ацы аз компетенциты нымæц у 45. Чемпионаты архайджытæ ерыс кæнынц машинæтæ цалцæг кæнынæй, хуызистытæ исынæй, ахорынæй æмæ æндæр хъуыддæгтæй. Æдæппæтæй сæ арæхстдзинад равдисдзысты 440 адæймаджы. Майы та ацæудзæн регионты хсæн къæпхæн. Фидараты Маринæ радзурдзæн бæстондæр.
Полиграфийы æмæ дизайны технологон колледжы цæттæ кæнынц ппофессионалон дæсныйады регионалон чемпионат «Абилимпикс»-мæ. Æрыгон фæлтæры цæттæ кæнынц 4 компетенцимæ гæсгæ. Иу аудиторийы лæппутæ æмæ чызджытæ фæлварынц къамтæ исын, иннæйы та сæ эксперт Къаболаты Ирлан ахуыр кæны техникæимæ кусыныл.
Сæрмагонд æфсæддон операцийы раздæры архайæг Тургиты Георгий Абилимпиксы архайдзæн дыккаг хатт. Ивгъуыд аз йæхицæн равзæрста компетенци «Машинæты цалцæг æмæ лæггад», фæлæ хатдзæгтæм гæсгæ призер сси æндæр компетенцийы.
Ныр Тургиты Георгий архайдзæн уыцы компетенцийы. Фæнды йæ сызгъæрин хæрзиуæг рамбулын. Ацы аз регионалон къæпхæны сæ арæхстдзинад æвдисынц республикæйы 440 цæрæджы. Компетенциты нымæц, раздæры азтимæ абаргæйæ, сырæзт 45-ы онг. Зæгъæм: «Робототехникæ», «Психологи», «Гид-экскурситæ аразæг».
Дзæуджыхъæуы бирæвæрсыг техникумы демонстрацион фæлварæн аразæн центры фæсивæд цæттæ кæнынц малярон æмæ декоративон куыстыты компетенцитæм. Разамонджытæ, конкурсон хæстæм гæсгæ, ахуыр кæнынц лæппуты æмæ чызджыты. Сæйраг нысан – обойтæ баныхасын, хуыз равзарын æмæ декоративон фактурæ скæнын.
23 ахуыргæнæндоны суыдзысты чемпионат арвитыны фæзтæ. Уымæй дарддæр 12-æм майæ 14-æм майы онг республикæйы арæзт æрцæудзысты, Абилимпиксы регионалон чемпионатты, Цæгат Кавказы æмæ Хуссар Федералон зылдты уæлахиздзауты хсæн ерыстæ.
