Чемпионат ацæудзæн 20-æм апрелæй 26-æм апрелы онг Албанийы
Европæйы чемпионаты агъоммæ, Уæрæсейы иугонд командæйæн уæгъдибар хъæбысхæстæй, Дзæуджыхъæуы ис кæронбæттæн æмбырд. Чемпионат ацæудзæн 20-æм апрелæй 26-æм апрелы онг Албанийы. Ам ма тренировкæгæнæн æмбырд ис, бæстæйы 21 азы онг сылгоймæгты иугонд командæйæн уæгъдибар хъæбысхæстæй. Уыдон дæр цæттæ кæнынц Европæйы фыццаг бынат бацахсыны турнирмæ. Бæлвырддæр радзурдзæн Хъайтмазты Дзерассæ.
Бæстæйы 21 азы онг сылгоймæгты иугонд командæйæн уæгъдибар хъæбысхæстæй Цæгат Ирыстоны ацы тренировкæгæнæн æмбырдтæ сты дыккæгтæ. Юниоркæтæ цæттæ кæнынц къæлиндары сæйрагдæр ерыстæй иутæм – Европæйы фыццаг бынат бацахсыны турнирмæ. Республикæйы ацы æмбырдтæ систы традицион.
Уæлæмхасæн гæнæн ма спортсменкæтæн – сæ бон, тыхджындæр хъæбысхæцджытæй амынддзинæдтæ райсын кæй у, уый. Дæсныйадæвдисæг ахуыр сарæзта Токиойы Олимпаг хъæзтыты бронзæ призер, Европæйы бирæ хæттыты чемпион Найфонты Артур.
Уæрæсейы нæлгоймæгты иугонд командæйæн дæр ам ис Европæйы чемпионатмæ цæттæгæнæн кæронбæттæн æмбырд. Сæйраг тренер Гуæцæлты Хадзымурат куыд загъта, афтæмæй ныртæккæ спортсментæ иттæг хорз цæттæ сты. Сæйраг хæс у æппынкъаддæр 3 сыгъзæрин майданы рамбулын. Ерысты чи архайдзæн, уыцы хъæбысхæцджыты номхыгъд бæлвырд у.
Нæлгоймæгты иугонд командæйы капитан у Абдулрашид Садулаев. Цæттæ кæныны сæйраг къæпхæн уыд Кисловодскы. Ныртæккæ фылдæр æргом здахынц хицæн фæлтæрæнтæм.
Европæйы чемпионат уыдзæн Албанийы 20-æм апрелæй 26-æм апрелы онг. Уæгъдибар хъæбысхæцджытæ гауызмæ рацæудзысты кæронбæттæн бонты.
