Уазджытæн бацæттæ кодтой цалдæр фæзы, кæцыты равæрдтой нывтæ, музейон экспонаттæ, сарæзтой дæсныйад æвдисæн ахуыртæ
Нæ зæрдыл дарæм. Хæзныдоны ацыд æмдзæвгæтæ аив кæсыны традицион конкурс æмæ футболон турнир Уæлахизы боны кадæн. Уазджытæн бацæттæ кодтой цалдæр фæзы, кæцыты равæрдтой нывтæ, музейон экспонаттæ, сарæзтой дæсныйад æвдисæн ахуыртæ. Бæрæгбоны уыд не сфæлдыстадон къорд. Бæстондæр хабæрттæ радзурдзæн Чехойты Фатимæ.
Зæрдæбын ныхæстæ мадæн – Чингиз Айтматовы рæнхъыты Хæзныдоны традицион мадзалы нысан. Саразынц æй æрвылаз Уæлахизы боны размæ, хæстæй йæ фырты ссыдмæ йæ царды бонты кæронмæ чи *нхъæлмæ каст, уыцы хъæуы цæрæг Хъамболты Мысырæты цыртдзæвæны раз. Ацы аз у 9-æм. Скульптурæ сæвæрдтой, Мысырæты хæдзар кæм лæууыд, уыцы бынаты. Ныр ардыгæй хъуысынц патриотон нысаниуæг кæмæн ис, ахæм зарджытæ, стæй мадæлты зæрдæты фидардзинады æмæ Фыдыбæстæ хъахъхъæнджыты хъайтардзинады тыххæй æмдзæвгæтæ.
Æмдзæвгæтæ кæсæджыты конкурс «Салдаты мады кадæн нæ сæртæ æркъул кæнæм» -ы конкурс сæмбырд кодта 100 архайæгæй фылдæр. Курдиæттæ лæвæрдтой комкоммæ хуызы – æрвыстой сæ видеороликтæ, кæцыты кастысты патриотон темæйыл фыст уацмыстæ. Жюрийы уæнгтæн уæлахиздзауты æмæ лауреатты 3 номинаци равзарын æнцон нæ уыд. Темырты Руслан сси хуыздæр нывæцæн фысджыты *хсæн. Лæппу ныффыста хæсты æмæ адæм уыцы азты цы зындзинæдтæ æвзæрстой, уый тыххæй æмдзæвгæ. Йæ ныхæстæм гæсгæ, дыууæ азы йæ ном ис æрыгон поэтты хыгъды, æххуыс ын кæны йæ мад, фæбæлвырд кодта Руслан.
Ацы аз конкурсы архайджытæн фадат уыд сæ курдиат равдисын журналист, поэт æмæ фыссæг Колыты Виталийы ног сæрмагонд номинацийы. Бирæ азты уыд жюрийы уæнг. Æрæджы ахицæн йæ цардæй, фæлæ йе сфæлдыстад рох нæу æрыгон фæлтæрæй.
Мадзалы фæлгæты æмдзæвгæтæ аив кæсыны конкурсæй уæлдай арæзт æрцыд турнир футболæй. Архайдтой дзы 6 командæйы Дзæуджыхъæуæй, Дыгуры æмæ Æрæфы районтæй. Хъазыдысты спорты ветерантæ. Уазджытæн, фыццаджыдæр та, сывæллæттæн ацы бон уыд æцæг бæрæгбон. Байгом сын кодтой цалдæр фæзы. Равæрдтой дзы аивадон скъолайы хъомылгæнинæгты нывтæ, музейы экспонаттæ, сарæзтой сын дæсныйад æвдисæн ахуыртæ цыллæ кæлмæрзæнтæ бийынæй.
Хъамболты Мысырæты хъысмæт сси мады зæрдæйы æууæнчы символ, йæ истори баиу кодта æрмæст Хæзныдоны цæрджыты нæ, фæлæ 9 азы дæргъы бæрæгбонмæ хъæумæ чи æрцæуы, уыцы адæмы. Салдаты мады цыртдзæвæныл кадджын уазджытæ сæвæрдтой дидинджытæ. Йæ фырты фырт Хъамболты Марат традицимæ гæсгæ ссыгъта мысæн мыдадзын цырагъ.
Хæст ныууагъта стыр фæд Фыдыбæстæйы сæрибардзинадыл чи тох кодта, уыцы адæмы зæрдæты. Стыр Уæлахизыл циндзинадæй æххæст сты курдиатджын сывæллæттæ. Кæд æрыгон сты, уæддæр æмбарынц, сæ фыдæлтæ, цæ цардыл нæ ауæрдгæйæ, цы ахсджиаг боны æрцыдмæ æнхъæлмæ кастысты, уый нысаниуæг. Хæзныдоны традицион бæрæгбоны кæрон фыццæгæм къласон Абайты Маркы хъæлæсæй азæлыдысты Семен Кирсановы æмдзæвгæйы рæнхъытæ.
