Бацæттæ йæ кодтой Уæрæсейы фольклорон цæдисы регионалон хайад æмæ аивæдты коледж
ЦИПУ-йы концертон залы ацыд сæрмагонд музыкалон проект. Бацæттæ йæ кодтой Уæрæсейы фольклорон цæдисы регионалон хайад æмæ аивæдты коледж. Сценæйæ хъуыстысты адæмон инструментты оркестры зæлтæ. Мадзалы уазæг уыди Стыр театры солист Дулаты Дзамболат. Программæмæ хаст æрцыдысты æфсæддон зарджытæ æмæ инструменталон музыкæ. Аивадон изæрæн æвдисæнтæ уыдысты куыд хистæр кары адæм, афтæ студенттæ æмæ сывæллæттæ, стæй йæ цард музыкæимæ чи сбаста, уыдон. Хæстон зарджытæ адæмы зæрдыл æрлæууын кодтой Фыдыбæстæйы Стыр хæсты ветеранты хъæбатырдзинад. Алы композицийы дæр ирдæй зынди уыцы рæстæджы тæваг. Æвзонг уазджытæн та фадат уыди ивгъуыды хъахъхъæнджыты æмæ абон се фсæддон хæс сæрмагонд æфсæддон операцийы чи ххæст кæны, уыцы фæлтæры бастдзинад фенынæн. Ацы концертæй байгом кодтой 9-æм майы бæрæгбонимæ баст номарæн мадзæлтты цикл.
