Æххæстгонд цæуы ныр æртыккаг хатт
Цæгат Ирыстоны цæуы «Фыдыбæстæ Хъахъхъæнджыты» фонды патриотон акци «Уæлахидзауты фæдонтæ». Æххæстгонд цæуы ныр æртыккаг хатт. Медиапроект бæтты Фыдыбæстæйы Стыр хæсты уæлахиздзауты сæрмагонд æфсæддон операцийы хъæбатыртимæ. Ахæм дæнцæг у Тыбылты бинонты истори. Уым лæгдзинады дæнцæг сси хæсты ветеран Дзæрæхмæт. Фронтмæ ацыд 16-аздзыдæй. Бинонты æфсæддон традицитæ ахæццæ кодтой йæ фæдонтæ. Бæлвырддæр радзурдзæн Хъайтмазты Дзерассæ.
Тыбылты Энвер сабибонтæй зыдта, нæлгоймаг уæвын кæй нысан кæны хъахъхъæнын бинонты, райгуырæн зæхх æмæ Фыдыбæстæ. Ууыл æй йе фсымæртимæ ахуыр кодта сæ фыдыфыд. Фыдыбæстæйы Стыр хæсты ветеран Тыбылты Дзæрæхмæт лæппутæн сси сæйраг дæнцæг.
Кадджын хистæры фæлтæрддзинад фæзынд æппæт бинонты хъысмæтыл дæр. Энверы æфсымæртæ сæ цард сбастой æфсæддон хъуыддагимæ. Уыдонæй иу у Тыбылты Марат. Уæрæсейы гвардийы сæрмагонд нысаниуæг кæмæн ис, уыцы дæлхайады афицер. Фыццаг бонтæй уыд сæрмагонд æфсæддон операцийы зонæйы. 2 хæрзиуæджы – Лæгдзинады ордентæ. Фарон февралы та Курскы бын знагæн ныхкъуырд кæй радта, уый тыххæй йын саккаг кодтой Уæрæсейы Хъæбатыры ном. Марат фæмард хæстон хæс æххæстгæнæгæйæ. Йæ фæстаг бонмæ иста хистæр фæлтæры хæстон фæлтæрддзинад.
Дзæрæхмæт лæгдзинады дæнцæг сси, 16 азы йыл куы сæххæст, уæд. Ветераны фырт мысы, цæмæй хæстмæ бахауа, уый тыххæй йæ бахъуыд йæ гæххæттыты райгуырды аз баивын.
Тыбылты бинонты истори хъахъхъæд æрцыд акци «Уæлахиздзауты фæдонтæ»-м гæсгæ. Ныр æй æртыккаг хатт æххæст кæны «Фыдыбæстæ Хъахъхъæнджыты» фонд. æмбырд кæнынц æмæ мыхуыр кæнынц Фыдыбæстæйы Стыр хæсты ветеранты æмæ сæ фæдонтæй абон сæрмагонд операцийы хæстæ чи æххæст кæны, уыдоны тыххæй радзырдтæ.
Фæлтæрты бастдзинад æппæт бæстæйæн ахсджиаг у. Нæ дæтты ферох кæнын Фыдыбæстæ хъахъхъæнджыты сгуыхтдзинад. Фонд цы историтæ сæмбырд кодта, уыдон фендзысты æппæт Уæрæсейы. Хъæбатырты æмæ сæ бинонты хуызистытæ суыдзысты стыр экспозицийы хай. Уæлахизы боны бæрæгбонмæ Уæрæсейы национ фонды равæрдзысты акци «Уæлахиздзауты фæдонты» архайджыты бинонты портреттæ.
