Сæ арæхстдзинад æвдисынц спорты алы хуызты
Беслæны цæуы скъолаты президентон хъæзтыты республикон къæпхæн. Сæ тыхтæ дзы æвзарынц муниципалон ерысты уæлахиздзаутæ. Æдæппæтæй 60 спортсмены. Сæ арæхстдзинад æвдисынц спорты алы хуызты. Тыхджындæртæ Цæгат Ирыстоны кад хъахъхъæндзысты федералон къæпхæны. Бæлвырддæр радзурдзæн Хъайтмазты Дзерассæ.
Æрыдойнаг командæйæн ацы республикон къæпхæн сæрмагонд у. Скъолаты президентон хъæзтыты сывæллæттæ фыццаг аз нæ архайынц, фæлæ финалмæ фыццаг хатт рацыдысты. Уый у бирæ мæйты куысты хатдзæг. Урокты фæстæ – тренировкæтæ, тренировкæты фæстæ – фæлварæнтæм цæттæ кæнын. Скъоладзаутæ куыд зæгъынц, афтæмæй æнцон нæу спортæй архайын æмæ ахуыр кæнын, фæлæ сæрмагондæй дисциплинæ æмæ командон иудзинад баххуыс кодтой республикæйы скъолаты сæйраг спортивон ерыстæм бахауын.
Баскетбол, волейбол, рог атлетикæ… Скъолайы президентон хъæзтытæ баиу кодтой спорты цалдæр хуызы. Уæлахизыл æмæ республикæйы кад иннæ къæпхæны хъахъхъæныны барыл тох кодтой Цæгат Ирыстоны 6 скъолайы. Архайджытæн хуымæтæг ерыстæ не сты. Ахæм фæлтæрддзинад сын æххуыс кæны ахуыр кæнын командæйы кусын, размæ тырнын æрмæст спорты нæ, фæлæ царды дæр.
Традицимæ гæсгæ республикон къæпхæн цæуы Беслæны спортивон комплексы бындурыл. Ам æрвылаз сæмбырд вæййынц æппæт республикæйæ скъолаты хуыздæр командæтæ. Комплексы директор Гуытъиаты Вячеславы ныхæстæм гæсгæ, архайджыты цæттæдзинады æмвæзад зынгæ сырæзт. Уыимæ та – тыхджындæр кæны командæты хсæн конкуренци дæр.
Ацы аз республикон къæпхæны архайы 60 спортсмены – сæ ппæт дæр сты муниципалон ерысты уæлахиздзаутæ. Тох кæнынц тыхджындæры ном райсыныл. Хуыздæр хатдзæгтæ цы комадæтæ равдисой, уыдон сентябры ацæудзысты Анапæмæ. Уым уыдзæн президентон хъæзтыты федералон къæпхæн.
