Бæрæгбоны кадæн æвзонг футболисттæн сарæзтой турнир æмæ æмбаладон матч Уæрæсейы легендарон чемпионты
Йæ юбилей сбæрæг кодта спортивон скъола «Æвзонгдзинад». 50 азмæ йын бирæ æнтыстдзинæдтæ ис. Бæрæгбоны кадæн æвзонг футболисттæн сарæзтой турнир æмæ æмбаладон матч Уæрæсейы легендарон чемпионты – скъолайы номдзыд рауагъдонты архайдимæ. Хъазтмæ бакæсынмæ æрбацыд бирæ адæм. Скъолайы традициты æмæ стыр футболон бæрæгбоны тыххæй радзурдзæн Хъайтмазты Дзерассæ.
Уæлахизтæ, дæсгай номдзыд футболисттæ æмæ спортивон азарт. Æнусы рдæгмæ спортивон скъола «Æвзонгдзинад»-æн чысыл нæ бантыст. 50 азы юбилейы кадæн ирон футболы ветерантæ бирæ азты фæстæ кадджын уавæры рацыдысты футболон фæзмæ.
Æмбападон матчы сæмбæлдысты Уæрæсейы чемпионтæ – Пагæты Артур, Дзæгъойты Алан, Æгайты Алан, Гогниты Спартак, Хъуысаты Алан, Дадтеты Аслан, Гæбулты Владимир. Ацы цау сын ахсджиаг у. Сæрмагондæй ам скодтой фыццаг къахдзæфтæ стыр спортмæ фæндагыл.
Ацы спортивон фæзмæ рацыд Дзæгъойты Аланæн æнæмæнг æхсызгон у. Фæлæ йæ зæрдæ фылдæр барухс, уыйбæрц футболуарзджыты кæй федта, уымæй. Сæ хыгъды, скъолайы ныры хъомылгæнинæгтæ дæр. Уæрæсейы чемпион мысы, кæддæр, нырма сывæллон уæвгæйæ, уый дæр афтæ цыд зындгонд спортсменты матчтæм. Йæ бæллиц уыд уыдоны хуызæн суæвын.
Спортивон скъола «Æвзонгдзинад» 1976-æм азы байгом кодта номдзыд футболист, нæ клубы æппæт советон историйы хуыздæр бомбардир Нодар Папелишвили. Уæд Цæгат Ирыстоны ахадгæйæ рæзыд футболы культурæ. 90-æм азты скъолайы рауагъдонтæн командæ «Алани»-йы хыгъды сæ къухы бафтыд стыр æнтыстдзинад – систы Уæрæсейы чемпионтæ. Уæд сбæрæг ис, «Æвзонгдзинад» у спортивон курдиатты куырдадз.
Ацы бон министр «Цæгат Ирыстоны физкультурæйы æмæ спорты райрæзты æнтыстдзинæдты тыххæй» кады нысантæ саккаг кодта скъола «Æвзонгдзинад»-ы тренертæн-ахуыргæнджытæн. Мадзалы уыдысты Дзæуджыхъæуы администрацийы сæргълæууæг Милдзыхты Вячеслав æмæ горæты минæвæртты æмбырды сæрдар Таболты Сергей. Футболон тренертæн радтой бузныджы фыстæджытæ.
«Æвзонгдзинад»-ы сæйраг æнтыстдзинад æрмæст кубоктæ æмæ майдантæ не сты, фæлæ ма футболистты фæлтæрты бастдзинад. Æмæ ацы традицитæ скъолайы дарддæр æххæст кæндзысты.
