Бафыссæн сæ ис фæллойы æмæ социалон рæзты министрадим
Нæ республикæйы кусы социалон контрактты программæ. Бафыссæн сæ ис фæллойы æмæ социалон рæзты министрадимæ. Программæйы архайыны бар ис алкæмæн дæр. Сæйраг домæн – фæрæзтæй нысанмæ гæсгæ пайда кæнын. Ахæм контракт бафыста студент Уалыты Давид. Фæнды йæ операторы куыст æмæ монтаж бæстон базонын. Хъайтмазты Дзерассæ радзурдзæн бæстондæр.
Цæгат Ирыстоны паддзахадон университеты журналистикæйы факультеты студент Уалыты Давидæн скъоладзау уæвгæйæ дæр цымыдисаг уыд видеоæрмæджытæ исын. Куыд зæгъы, афтæмæй йын хуымæтæг хобби нæу. Камерæйы фæрцы æппæтæй ирддæр цаутæ нысангонд æрцæуынц.
Давид у студентон медиацентр «RECORD MEDIA»-йы сæрдар. Сæрмагондæй ам, иузæрдионты хсæн, рæзын кæны йæ гæнæнтæ, куыд оператор æмæ видеомонтажер. Сфæлдыстадон фæсивæдимæ Давид архайы университеты алы мадзал дæр бæстонæй равдисыныл, кусы æндæр проекттыл дæр. Зæгъæм, командæ «Барбашовы фæзы» систа документалон киноныв.
Давидмæ ма бирæ ног, цымыдисаг хъуыдытæ ис. Уыдон царды рауадзынæн хъæуы ног кусæнгæрзтæ. Цæмæй фидæны проекттæ сæххæст кæнынæн фæрæзтæ райса, уый тыххæй бафыста социалон контракт.
Цæгат Ирыстоны социалон контракттæ бафыссын сæ бон у сæрмагонд амалхъом адæмæн, æмæ хи хъуыддагыл хæст чи у, уыдонæн, фæкæсынхъуаг бинонтæн сывæллæттимæ, йе фтиæгтæ, цæрыны æппынкъаддæры фæрæзты бæрцæй ныллæгдæр кæмæн сты, ахæм иунæг адæймæгтæн, хæстон цауты ветерантæн æмæ сæрмагонд æфсæддон операцийы архайджытæн. Сæйраг домæн у, фæрæзтæ нысанмæ гæсгæ схардз кæнын æмæ социалон адаптацийы программæ сæххæст кæнын. Уымæ хауы куыст ссарын, хъуыддаг рæзын кæнын, хæдзарад дарын.
Социалон контракт бафыссынмæ курдиат бадæттын ис онлайн хуызы Паддзахадон лæггæдты порталы кæнæ та бирæвæрсыг центрты хайæдты.
