Сæ коллекцитæ бацæттæ кодтой 15 дизайнеры Уæрæсейы алы регионтæй, Хуссар Ирыстонæй æмæ Азербайджанæй
Республикæйы байгом Кавказаг модæйы дыккаг къуыри. Сæ коллекцитæ бацæттæ кодтой 15 дизайнеры Уæрæсейы алы регионтæй, Хуссар Ирыстонæй æмæ Азербайджанæй. Программæйы – равдыстытæ, армукъа æмæ тематикон дæсныйадæвдисæг ахуыртæ. æрыгон модельерты архайд у модæйы ацы къуырийы хицæндзинад. Бæстондæр хабæрттæ радзурдзæн Чехойты Фатимæ.
Кавказаг модæ ныфсджындæрæй парахат кæны традициты æмæ нырыккон рæстæг иугæнæг тыгъдады. Дарæсы къуыри байгом кодта зындгонд дизайнер Годжыцаты Изольдæйы этно-коллекци. Къухæй хуыд 12 къабайы – Цæгат Кавказы адæмты национ модæйы хицæндзинæдтыл дзурæг, регионы культурон хæзнатæ *вдисæг. Бæрæгбон дарддæр ахæццæ кодта æрыгон дизайнер Хуссар Ирыстонæй Косты Татьянæйы коллекци «Фынтæ ивгъуыдыл». Авторы ныхæстæм гæсгæ, этникон нысаниуæг кæмæн ис, уыцы куыст домы уæлдай бæрнондзинад, дизайнер æрмæст дарæс саразæг нæу, фæлæ адæмы культурон мысинæгты дунемæ фæндагамонæг.
Кавказаг модæйы къуыри 2-аг хатт цæуы Цæгат Ирыстоны. Ацы аз æй сарæзтой традицион хæзнаты кадæн. Проект баиу кодта дизайнерты æрмæст Уæрæсейы регионтæй нæ, фæлæ фæсарæнтæй дæр. Проекты арт-президент Уататы Зæринæйы ныхæстæм гæсгæ, коллекцитæн се *рыгондæр саразæгыл цæуы 16 азы. Алы дизайнер дæр хъуамæ бацæттæ кæна ног дарæс æмæ йæ фыццаг хатт равдиса Кавказаг модæйы къуырийы – уыцы хæс æвæрд уыд алы архайджы размæ дæр.
Архайджыты хъуыдымæ гæсгæ, нырыккон модæ у – культурон хæзнатæ хъахъхъæнынæн хорз фадат. Национ нывæфтыдтæ, хæрдгæбыды рагон хуызтæ, дизайнерон нырыккон фæрæзтæ автортæн сты хорз фадат традицитæ равдисынæн.
Модæйы къуыри – æрмæст коллекциты равдыст нæу, фæлæ алывæрсыг ахуырадон программæ. Архайджытæн бацæттæ кодтой лекцитæ дарæсы историйæ, индустрийы рæзты æмæ нырыккон дизайны традицион æрмдæсныйады хуызтæ бахъахъхъæныны тыххæй. Проекты фæзтæй иу у республикæйы национ музей. Ам фенæн ис армукъа -равдыст, цæуынц дзы дæсныйад æвдисæн ахуыртæ кæлмæрзæнтæ бийынæй. Модæйы къуырийы архайджытæ сæ коллекцитæ дæр ам равдыстой.
Кавказаг модæйы къуыри – цымыдисаг сфæлдыстадон проект. Ахæсдзæн 19 июнмæ.
