Радон гуманитарон æххуыс арвыстой Цæгат Ирыстонæй Дагестанмæ
Иумæ уæвгæйæ, кæрæдзийы фарсмæ æрбалæугæйæ, цыфæнды зындзинады ныхмæ дæр тох кæнæн ис. Радон гуманитарон æххуыс арвыстой Цæгат Ирыстонæй Дагестанмæ. Донивылдтытæй хъыгдардбаййафæг бирæсывæллонджын бинонтæн арвыстой хæдзары хъæугæ техникæ. Цæгат Ирыстоны æмæ Дагестаны Адæмон фронты минæвæрттæ расидтысты хæрзаудæн акци. Уазалгæнæнтæ, газы пецтæ æмæ гæрзтæхсæн машинæтæ балхæдтой Беслæны 1-æм æмæ 4-æм, стæй Дзæуджыхъæуы 3-æм скъолатæ. Баластой сæ дагестайнаг хъæутæ Адильотар æмæ Новый Цилитльмæ. Гуманитарон æххуысы иу хай та арвыстой Махачакаламæ. Хицæн арфæйы аккаг сты нæ республикæйы равдыстытæ аразæн Фонды кусджытæ. Уыдон хъыгдард баййафæг районтæн арвыстой дæсгай хъармгæнæнтæ. Ахсджиаг у зын сахат æххусы къух бадарын. Дагестаны цæрджытæ дæр Беслæны теракты фæстæ зæрдиаг æххуыс бакодтой Ирыстоны адæмæн. æмæ куыд фæзæгъынц, раттаджы къух райсаг у.
