Уым сын, хæхты астæу, бацæттæ кæнынц, æнкъард кæнын сæ чи нæ уадза, ахæм алывæрсыг программæ
Сæрдыгон каникултæ æрмæст хъæлдзæг рæстæг нæу, фæлæ цымыдисаг æмæ зонындзинæдтæ исыны уæлæмхасæн фадат. Лагерь «Фидæн» Махческы дыккаг аз суазæг кæны сывæллæтты. Уым сын, хæхты астæу, бацæттæ кæнынц, æнкъард кæнын сæ чи нæ уадза, ахæм алывæрсыг программæ. Кæнынц чъиритæ, ахсынц цыхт, сфæлдыстадон æмæ интеллектуалон æгъдауæй рæзынц. Лагерь ахæм бынаты æнæмæнг хъæуы, горæты чи цæры, уыдоны. Бæстондæр радзурдзæн Чехойты Фатимæ.
Репетицитæ цæуынц æнæ *рлæугæйæ. Цалдæр боны фæстæ ацы номертæ суыдзысты, æвзонг лæппутæ æмæ чызджыты лагерь «Фидæн»-ы фыццаг фæлтæр чи *хгæндзæн, уыцы концертон программæйы хай. Вероника Кусиди ацы рæстæг йæ зæрдыл дардзæн бирæ азты. Хæххон лагеры йæ фæллад фыццаг хатт уадзы.
Абайты Эрнест ардæм æрбацыд дыккаг хатт. Йæ ныхæстæм гæсгæ, æрбаздæхыны тыххæй бирæ хъуыдытæ нæ кодта. Фаронæй йæ зæрдыл бадардта дæсныйад æвдисæн ахуыртæ æмæ алывæрсыг программæ. Уымæ гæсгæ ацы сæрд дæр равзæрста «Фидæн».
Суткæгай цы лагерь куса, уый байгом кæныны хъæппæрис сæвзæрд Республикæйы сывæллæтты сфæлдыстады галуаны. Уым бацæттæ кодтой æрыгон хъомылгæнинæгты. Уыдон алы бон дæр сывæллæттæн саразынц брейн-рингтæ, спортивон ерыстæ, сфæлдыстадон конкурстæ, баххуыс сын кæнынц концертмæ цæттæ кæнгæйæ. Педагогон колледжы студенткæ Цæболты Аланæйæн ацы хъомылгæнæджы куыст у ахсджиаг фæлтæрддзинад.
«Фидæн» кусы дыккаг аз, фæлæ йæ скъоладзаутæ ныридæгæн бауарзтой. Спортивон æмæ аивадон ахуыртæй уæлдай ма сывæллæттæ фæцæуынц балцыты, фæлтæртæ гом кæныны æмæ æхгæныны кадджын мадзæлтты базонгæ вæййынц райгуырæн зæххы традицитимæ. Махческы цæрджытæ сын саразынц дæсныйад æвдисæн ахуыртæ, равдисынц сын чъиритæ куыд кæнынц, цыхт куыд ахсынц, мыды чыргъæдтæм куыд зилынц, уыдæттæ.
Ныртæккæ лагеры сæ фæллад уадзынц 37 сывæллоны, дих сты дыууæ отрядыл. Тагъд рæстæг фыццаг фæлтæр фæуыдзæн. Фæлæ сæрд лагеры дарддæр цæуы. Фидæны ма дзы уыдзæнис 2 фæлтæры — дæсгай скъоладзауы ма сæ каникултæ арвитдзысты цымыдисæй æмæ пайдаимæ.
