Дæтдзысты йæ ахуырады къабазмæ стыр æвæрæн бахæссыны тыххæй
Республикæйы нысангонд æрцæудзæн ахуыргæнджытæн ног уæлдæр цин — «Цæгат Ирыстоны адæмон ахуыргæнæг». Дæтдзысты йæ ахуырады къабазмæ стыр æвæрæн бахæссыны тыххæй. Ахæм уынаффæ хаст æрцыди республикæйы хицауады æмбырды. Ныридæгæн «Цæгат Ирыстоны сгуыхт ахуыргæнæджы», кæнæ «Цæгат Ирыстоны ахуырады сгуыхт кусæджы» ном чи хæссы, уыцы ахуыргæнджытæн ацы хæрзиуæг суыдзæн радон къæпхæн. Хицауады уæнгтæ ма хорзыл банымадтой скъоладзауы уæлæдарæс дæттыны æмæ техникумтæм ахуыр кæнынмæ бацæуыны тыххæй льготæты фæткмæ ивддзинæдтæ бахæссын. Ногдзинæдтæ фæзындзысты 7 мин скъоладзауыл æмæ студентыл. Хицауады æмбырды фæткы цы фарстатæ уыди, уыдонæй иу баст уыди республикæйы фæндаггон-транспортон инфраструктурæйы модернизациимæ. Ацы хæрдзтæн дихгонд æрцыди 7 миллиард сомы. Ныхас цыди Музейты фонды уавæрмæ цæстдардыл дæр.
