Ацыд Цæгат Ирыстоны
Уæрæсейы социалон фонды контактон центрты куысты аразгæ интеллекты технологитæй пайда кæныныл ныхас цыдис регионты *хсæн æмбырды, ацыд Цæгат Ирыстоны. Байхъуыстой экспертты докладтæм. Æдæппæтæй дзы архайдтой 14 контактон центры разамонджытæ. Бæстондæр радзурдзæн Чехойты Фатимæ.
Алы дзæнгæрæг дæр — цардæй ист уавæр, алы фарст дæр домы тагъд æмæ бæстон дзуапп. Уæрæсейы Социалон фонды Иумæйаг контактон центртæ сты 14. Се стырдæр ис Цæгат Ирыстоны. Æрвылбондæр бастдзинад æххæст кæнынц 140 операторы. Бæстæйы цæрджытæн дæттынц дзуæппытæ пенсийы, фиддонты, мадæлты капиталы æмæ социалон æххуысы æндæр хуызты тыххæй фарстытæн. Хъесаты Ритæйæн ахсджиаг у алы адæймагæн дæр бæстон дзуапп раттын.
Контактон центрты куыст цæуы къæпхæнгай: фыццаг у федералон. Уым оператортæ дзуæппытæ дæттынц адæмы сæйраг фарстытæн. Лыстæгдæр æркаст чи фæдомы, уыдон та раттынц дыккагмæ — регионалонмæ. Ахæмтæ ис алы субъекты дæр. Æппæты фылдæр куыст вæййы мæйы фыццаг бонты — социалон æххуыс исыны рæстæг. Райдиан къæпхæны специалисттæ иу бонмæ райсынц сæдæйæ фылдæр дзæнгæрæджы. Чи бадзуры, уыцы адæмы æнхъæлмæ кæсын фæхъæуы æрмæст минуты *рдæг. Уый та рауайы операторты, стæй нырыккон технологиты руаджы. Аразгæ интеллект адæймаджы нæ ивы — æххуыс ын кæны. Нымæцон ассистент раздæр райсы курдиæттæ, æркæсы фарсты мидисмæ, сбæрæг кæны адæймаджы эмоционалон уавæр. Кæд системæ раиртасы æрбадзурæджы тызмæг ахаст, уæд дзæнгæрæг бакæны фæлтæрдджын специалисты бæрны.
Нымæцон технологиты рæзт сси регионты *хсæн æмбырды сæйраг темæ. 3 боны дæргъы бæстæйы алы рæттæй специалисттæ Цæгат Ирыстоны æрныхас кодтой аразгæ интеллекты ног къæпхæнтыл. Уыдоны руаджы контактон центрты куыст суыдзæн — рæвдздæр, бæлвырддæр, æнцонвадатдæр куыд оператортæн, афтæ цæрджытæн дæр. Уыимæ специалисттæн бæлвырдгонд у: технологитæ цыфæнды ног куы уой, уæддæр удæгас адæймагимæ ныхас нæ баивдзысты.
Аразгæ интеллект æххуыс у цыбыр рæстæгмæ бæлвырд дзуапп раттынæн, фæлæ Иумæйаг контактон центртæн сæйраг у адæймагмæ ахаст. Уый тыххæй куысты хæрзхъæддзинад æрмæст дзуапп раттыныны рæстæгмæ гæсгæ нæ бæрæг кæнынц, фæлæ лæгæдтæ исджыты æрфарсты хатдзæгтæм гæсгæ дæр: курдиæттæн сæ 97 %-æн адæм сæвæрынц хорз бæрæггæнæнтæ.
