Архайджытæн бацæттæ кодтой лекцитæ æмæ дæсныйадæвдисæг ахуыртæ
Цæгат Кавказы уавæрты хорз тыллæг чи раттдзæн, ахæм хуызтæ æмæ технологитимæ аграрон къабазы кусджыты базонгæ кæнын. Уый уыдис традицион форум «Быдыры бон»-ы нысан. Арæзт æрцыд Уæрæсейы наукæты Академийы Дзæуджыхъæуккаг зонадон центры. Архайджытæн бацæттæ кодтой лекцитæ æмæ дæсныйадæвдисæг ахуыртæ. Бæлвырддæр форумы тыххæй радзурдзæн Чехойты Фатимæ.
Хæрзад пъамидортæй хъæдуры стæм хуызты онг — Дзæуджыхъæуккаг зонадон центры быдырты фенæн ис селекционерты бирæазон куысты хатдзæгтæ. Форумы уазджытæн равдыстой, бынæттон уавæрты чи зайы, ахæм халсарты æмæ хоры культурæтæ. Базонгæ сæ кодтой мыггæгты уникалон æмбырдгæндтимæ. Ахуыргæндты куысты сæйраг къабæзтæй иу — раздæхын бынæттон рагон хуызтæм. Афтæ ногæй æрзайын кодтой пъамидор «Терский». 1977-æм азæй фæстæмæ йæ нал сагътой. Сзадысты, дæсгай азты рохгонд чи уыдис, хъæдуры ахæм хуызтæ — «Зинаидæ» æмæ «Варварæ».
Зонадон-рауагъдон форум æрмæст зайæгойтæ равдисынæн арæзт нæу, фæлæ кæрæдзийы фæлтæрддзинадимæ базонгæ уæвынæн дæр. Специалисттæн бацæттæ кодтой дæсныйад æвдисæн ахуыртæ æмæ хъæууон хæдзарады нырыккон биологон методты тыххæй практикон семинартæ. Ныхас кодтой ветеринарийы рæзтыл дæр — эксперттæ дзырдтой хъæууон хæдзарадон цæрæгойты иугæндзон инфекцион низты диагностикæйы, стæй сæ дзæбæх кæныны нырыккон фадæтты тыххæй. Форум традицимæ гæсгæ арæзт æрцыд Уæрæсейы зонæдты Академийы Дзæуджыхъæуккаг зонадон центры фæзы. Уазджыты *хсæн — аграрон къабазы кусджытæ æмæ фермертæ æппæт Цæгат Кавказæй. Алы архайæджы хæс дæр уыдис — нырыккон иртæстытимæ базонгæ уæвын. Уыдонæн сæ сæйрагдæртæ — мæнæуы, картофы, хъæдуры æмæ холладжы селекци æмæ мыггæгтæ цæттæ кæныны куыст.
Хохаг æмæ хæхтæм хæстæг хъæууон хæдзарады Институты директор Козырты Сосланы ныхæстæм гæсгæ, форумы сæйраг хæс у æнæивгæ — аргарон кусджытæн равдисын, Цæгат Кавказы уавæрты хорз тыллæг чи ратдзæн, ахæм хуызтæ æмæ технологитæ. Специлистты хъуыдымæ гæсгæ, ахсджиаг у, форумы астæуккаг профессионалон ахуырады студенттæ дæр кæй архайынц, уый. Уыдон дæр равдыстой сæ куысты хатдзæгтæ.
Зонадон-практикон конференцийы ахуыргæндтæ æрныхас кодтой нырыккон иртасæнты, аграрон зонады рæзты æмæ хъæууон хæдзарады ног технологитыл. Форум та сбæлвырд кодта: ам райгуырынц, райсом регионы æмæ бæстæйы фæлхасады æдасдзинады бындур цы уынаффæтæй арæзт уыдзæн, уыдон.
