Фыццаг сызгъæрин хæрзиуæг нæ республикæйы историйы
Абон 50 азы æххæст кæны, Ирыстоны ирд минæвар, уарзон спортсмен Андиаты Сослан олимпаг хъæзтыты уæлдæр къæпхæныл куы рлæууыд, уыцы цауыл. Фыццаг сызгъæрин хæрзиуæг нæ республикæйы историйы. Афтæмæй райдыдта Ирыстоны хъæбысхæсты рæсугъд истори. Монреалы цы стъалы ссыгъд, уый ныртæккæ дæр уæлахизтæм фæндагмаонæг у æрыгон богæлттæн. Андиаты Сосланы цардыл афæлгæст Хъайтмазты Дзерассæ.
50 азы размæ уыд Цæгат Ирыстоны спортивон историйы ирддæр цаутæй иу. 1976-æм азы 31-æм июлы Андиаты Сослан Монреалы схызт Олимпаг хъæзтыты пьедесталы уæлдæр къæпхæнмæ. Æрмæст йæхи сыгъзæрин нæ уыд. Республикæйы историйы – фыццаг. Стыр спортмæ байгом кодта фæндаг хъæбысхæцджыты бирæ фæлтæртæн. Канадæмæ, уæд Советон Цæдисы 4 хатты чемпион æмæ дунейы 2 хатты чемпион цыд, куыд фаворит, афтæ. Уыдис ын 6 ныхмæлæуды. Хатдзæг: 4 сыгъдæг уæлахизы æмæ 2 – баллтæм гæсгæ. Советон хъæбысхæцæгмæ кастысты æппæт дунейы.
Иннæ олимпаг цикл дæр Андиаты Сослан афтæ ныфсджынæй сæххæст кодта. Рамбылдта ма дунейы чемпионатты 2 майданы. 1980-æм азы Мæскуыйы Олимпиадæйы номдзыд хъæбысхæцæг гауызмæ рацыд Советон Цæдисы иугонд командæйы капитаны хуызы. 5 ныхмæлæуды – 5 уæлахизы. 2-аг сыгъзæрин майдан ын йæ статус сфидар кодта. Сси фыццаг хуыздæрты хсæн.
Ахæм æнтысдзинæдтæ сты мингай сахатты куысты æмæ легендарон советон тренер, уæгъдибар хъæбысхæсты ирон скъолайы бындурæвæрæг Дзгойты Аслæнбеджы фæллойы хатдзæгтæ. Андиаты Сосланæн бакуыста сæрмагонд программæйыл. Олимпаг бæрзæндтæм схизынмæ спорстменæн æххуыс кодтой йе фсымæртæ-тренертæ дæр – Геннадий æмæ Сергей. Сæ цæстдардæй алы азмæлд дæр бæлвырд æххæст кодта.
Андиаты Сослан – Олимпаг хъæзтыты 2 хатты чемпион уæгъдибар хъæбысхæстæй: «Он заставлял сотни раз проводить этот прием, чтобы доводить его до совершенства. Он никого так не хвалил, но повернется в сторону, якобы, он разговаривает с другим человеком и слышишь, работая на ковре: «Посмотри, он сегодня хорошо поработал, он сегодня заслужил». И человек, получив эту похвалу, крылья вырастали, и хотелось еще больше работать».
Андиаты Сосланы триумф Монреалы бындур сæвæрдта бирæ ног уæлахизтæн. Уæдæй фæстæмæ иу сæрдыгон олимпиадæ дæр республикæйæн æнæ майданæй нæ уыд. Андиаты Сосланы фæстæ олимпаг гауызмæ рацыд ирон хъæбысхæцджыты ног фæлтæр.
Андиаты Сосланы хыгъды ис Олимпиадæты 2 уæлдæр хæрзиуæджы, дунейы чемпионатты 4 æмæ Европæйы 3 сыгъзæрин майданы, Советон Цæдисы сгуыхт тренеры ном. 3 хатты рамбылдта дунейы Кубок, 7 хатты сси Советон Цæдисы чемпион. Йе сгуыхтдзинæдты тыххæй Андиаты Сослан официалон æгъдауæй хаст æрцыд хъæбысхæсты æппæтадæмон федерацийы намысы залмæ. Сси дæнцæг сæдæгай лæппутæн.
Абон номдзыд чемпионы тыххæй намыс цæры æрмæст историйы сыфтыл нæ. Æрвылаз Цæгат Ирыстоны арæзт цæуы Андиаты Сосланы номыл æппæтуæрæсеон турнир. Дæсгай азты дæргъы ацы ерыстæ сæдæгай æрыгон хъæбысхæцджытæн систы стыр спортмæ къæпхæн. Ацы аз мадзалæн ис сæрмагонд статус. Æппæтадæмон. Монреалы сыгъзæрины 50 азмæ турнираразджытæ цæттæ кæнынц æцæг бæрæгбон. Андиаты Сосланы уæзы категорийы уæлахиздзау традицимæ гæсгæ райсдзæн ерысты сæйраг приз – автомобиль.
Монреалы цы стъалы ссыгъд, уый ныры онг дæр рухс кæны æрыгон хъæбысхæсджыты фæндаг. Андиаты Сослан йæ фæстæ ныууагъта уæлахиздзауы генетикон код. Цы историйæн бындур сæвæрдта, уый абон дарддæр æххæстгонд цæуы алы ног уæлахизы дæр.
