Архайынц дзы 200-мæ хæстæг спортсмены
Уæллаг Фыййагдоны цæуы егъау футболон фестиваль. Архайынц дзы 200-мæ хæстæг спортсмены. Хæрзиуджытыл ерыс кæнынц бæстæйы алы регионтæй 20 командæйæ фылдæр. Матчтæй уæлдай лæппутæн бацæттæ кодтой спортивон конкурстæ æмæ ирхæфсæн программæ. Цæмæй хъæзтытæ æнтыстджын æмæ цымыдисаг рауайой, уый тыххæй арфæтæ кæнынмæ ссыд сæрмагонд уазæг. Бæстондæр хабæрттæ Чехойты Фатимæмæ.
Уæллаг Фыййагдон та ногæй сси бæстæйы æвзонг спортсменты фембæлды бынат. Фестивалы архайджытæ — 8 азæй 11 азы онг кæуыл цæуы, ахæм 200-мæ хæстæг лæппуйы. Се *хсæн — сывæллæтты футболон скъолайы футболон клуб «Дзæуджыхъæу»-ы размæбырсæг Битъиты Арсен. Тренировкæтæ кæны афæдзæй фылдæр. Йæ ныхæстæм гæсгæ, ацы спорты хуызмæ уарзондзинад банкъардта йæ сыхаг лæппуты руаджы, уыдонимæ-иу кæрты арæх хъазыдис футболæй. Ныридæгæн архайдта цалдæр турниры, фидæнмæ йæ размæ æвæры ног нысантæ. Фестивалы райдианмæ тынг æнхъæлмæ каст. Æрмæст хъæзтыты тыххæй нæ, — фæндыдис æй Медиалигæйы спортсменты фенын.
Турнир байгом кодтой кадджын уавæрты, йæ архайджытæн дзы рауад æцæг бæрæгбон. Футболон Медиалигæйы хъазæг Ромео уыдис фестивалы уазæг. Уый уынд лæппутæн уыд уæлдай æхсызгон. Æвзонг футболисттæ йемæ радыгай истой сæ къамтæ, уый та сын лæвæрдта автографтæ. Спортсмен йæхæдæг дæр зæрдиагæй аныхас кодта лæппутимæ, арфæ сын ракодта, йæ зæрдæ сын загъта ирд уæлахизтæ.
Футболон фестиваль арæзт æрцыд дыккаг хатт. Фаронимæ абаргæйæ, ацы аз сæмбырд кодта бирæ архайджыты. Хæрзиуджытæ рамбулыныл ерыс кæнынц бæстæйы алы регионтæй 20 командæйæ фылдæр — коллективтæ Цæгат æмæ Хуссар Ирыстонæй, Мæскуыйæ, Ессентукийæ, Астраханæй æмæ Стъараполы крайæ. Фестиваль æрмæст матчтæй арæзт нæу, архайджытæн бацæттæ кодтой спортивон конкурстæ, ирхæфсæн фæзтæ, зындгонд футболисттимæ фембæлдтытæ. Саразджыты ныхæстæм гæсгæ, ахæм мадзæлттæ сывæллæттæн æххуыс сты æрмæст фæлтæрддзинад фæфылдæр кæнынæн нæ, фæлæ бæстæйы иннæ регионты минæвæрттимæ зонгæ кæнынæн, командæйы уæнгтимæ иумæйагæй кусын ахуыр кæнынæн æмæ ерысты архайыны фæлтæрддзинад банкъарынæн.
Бирæ лæппутæн ацы фестиваль хуымæтæг турниры арæнтæй рагæй фæуæрæхдæр. У хорз фадат иннæ регионтæй хæлæрттимæ фембæлынæн, ныхмæлæуджытимæ хъазгæйæ, тыхтæ сбæрæг кæнынæн æмæ хи цæттæдзинад равдисынæн. Футболон фестиваль цæуы 3 боны. Йе*хгæныны кадджын мадзалы тыхджындæр командæтæн лæвæрд æрцæудзысты кубоктæ æмæ майдантæ, иннæ архайджытæ та семæ аласдзысты зæрдылдарæн лæвæрттæ.
