Уый тыххæй аппаратон æмбырды фехъусын кодта ахуырады æмæ наукæйы министр Алыбекты Эллæ
7 мин 700 курдиатæй фылдæр ацы аз балæвæрдтой Цæгат Ирыстоны фыццаг къласмæ бацæуынæн. Уый тыххæй аппаратон æмбырды фехъусын кодта ахуырады æмæ наукæйы министр Алыбекты Эллæ. Йæ ныхæстæм гæсгæ, активонæй цæуы ахуырадон организациты цæттæдзинад ног ахуыры азмæ. æдæппæтæй сты 469. Ныридæгæн цæттæ сты 300-йæ фылдæр. Цæрæнуæтты-коммуналон хæдзарады, артаджы æмæ энергетикæйы министр Хъараты Тимур радзырдта, ивгъуыд къуырийы ламидæтты зæйтæ кæй рацыд, уый тыххæй Алагиры доны хæрзхъæддзинады бæрæггæнæнтæ чысыл фæкъуыхцы сты. Специалисттæ сæвæрдтой уæлæмхасæн гидролизон фæрæзтæ. Ныртæккæ науазæн дон дзуапп дæтты æппæт нормæтæн. Дзырдтой артаджы уавæрыл дæр. Ивгъуыд къуыримæ зынгæ нæ аивта. Абоны онг бензин ис 2 мин 160 тоннæйы æмæ дизелон артаг – 2 мин 104тоннæйы. Цæгат Ирыстоны сæргълæууæг Сергей Меняйло бабар кодта, уавæрмæ лæмбынæг цæст дарын. Культурæйы министр Гуыдиаты Батраз радзырдта, сентябры Тауаситы Сослæнбеджы номыл нывкæнынады скъолайы байгом уыдзæн дыккаг креативон индустрийæты скъола. Ныртæккæ дзы фæвæййы цалцæг, æлхæд цæуынц æппæт хъæугæ ифтонггæрзтæ.
