Дзæуджыхъæуы бирæфатерон хæдзæртты специалисттæ иуварс кæнынц лыггæнинаг фарстатæ, зилынц коммуникацитæм
Цæгат Ирыстоны ахадгæйæ цæттæ кæнынц ног хъармгæнæн сезонмæ. Дзæуджыхъæуы бирæфатерон хæдзæртты специалисттæ иуварс кæнынц лыггæнинаг фарстатæ, зилынц коммуникацитæм. Ныртæккæ хъармæй æххæстгæнæн æмæ разамынддæттæг организацитæ кусынц хъармгæнæн сезонмæ цæттæдзинады акттыл. Бæлвырддæр радзурдзæн Хъайтмазты Дзерассæ.
Аркъауты Олег Ватутины уынджы 116-æм хæдзары цæры 50 азæй фылдæр – куы йæ сарæзтой, уæдæй фæстæмæ. Уыцы рæстæгмæ федта цалдæр разамынддæттæг компанийы. Æмæ дзы иу дæр сæ сæйрагдæр риссагдæр фарстатæй иу кæронмæ нæ алыг кодта.
Ам доны хæтæлтæ никуы ивтой, æрмæст кодтой хуымæтæг цалцæггæнæн куыстытæ. Уымæлады аххоссаг у, хæдзар бетонæй блоктыл кæй лæууы, æмæ уырдæм дон кæй хъары, уый. Радон хатт фарстамæ йе ргом раздæхта бюджетон куыстуат «Домоуправление».
Пъадвалы куыстытæ сæххæст кодтой хъармгæнæн сезонмæ цæттæгæнгæйæ. Дзæуджыхъæуы администрацийы ведомствæты хсæн кусæг къамис бæлвырд кæны бирæфатерон хæдзæртты цæттæдзинад.
Ватутины уынджы 60-æм хæдзары пъадвал къуындæг у ныллæг царимæ. Цæрджытæ ма хъаст кодтой, рухс кæй нæ фаг кæны æмæ тæвд доны куыст кæй къуылымпы кæны, уымæй. Ныртæккæ фарстатыл куыст цæуы. Æдæппæтæй абоны онг цæттæ сты 300 бирæфатерон хæдзарæй фылдæр.
Уый у горæты администрацийы æмæ цæрæнуæтты-коммуналон хæдзарады æппæт системæйы ахсджиагдæр хæстæй иу.
