Сног кодтой коммуникацитæ, сæххæст кодтой мидаивгæнæн куыстытæ
Сунжæйы бындуронæй цалцæг кæнынц сывæллæтты рæвдауæндон. Сног кодтой коммуникацитæ, сæххæст кодтой мидаивгæнæн куыстытæ. Ныртæккæ цалцæг кæронмæ фæхæццæ кæны. Рæвдауæндон хъомылгæнинæгтæн йæ дуæрттæ байгом кæндзæн сентябры. Бæлвырддæр радзурдзæн Хъайтмазты Дзерассæ.
25 азмæ Сунжæйы рæвдауæндоны бындурон цалцæг фыццаг хатт ис. Бæстыхай æххæстæй ног кæнынц, уыимæ зилынц æрмæст сæйраг агъуыстытæм нæ. Пъадвалы раздæр æмбырд кодтой зæххы бынæй дæттæ, ныр сæвæрдтой дренажон системæ.
Рæвдауæндоны æххæстæй сног кодтой инженерон коммуникацитæ, баивтой дуæрттæ, хъармгæнæнтæ, сантехникæ. Хицæн æргом аздæхтой сывæллæтты æмæ хъомылгæнинæгты æдасдзинадмæ: базылдысты æддаг асинтæм æмæ пандустæм, стæй ма сyог кодтой зынгсирвæзтыты сигнализацийы системæ. Ныртæккæ куыстытæ кæронмæ фæвæййынц. Дыккаг уæладзыджы ныридæгæн фесты ахорæн куыстытæ, байтыдтой линолеум, дарддæр æвæрынц плиткæ. Уыцы иу рæстæг хихсæн агъуыстыты æвæрынц ног ифтонггæрзтæ.
Сног кодтой агъуыстыты æддаг бакаст дæр. Нысангонд дизайн-проектмæ гæсгæ къултæ саив кодтой нывтæй. Афтæмæй уаттæ систы райдзастдæр.
Куыстытæ фæуын фæнд кæнынц августы кæрон. Ног мæйы та цалцæггонд рæвдауæндон байдзаг уыдзæн сывæллæтты хъæлдзæг худтæй. Национ проект «Бинонтæ»-м гæсгæ ацы аз сног кæндзысты 6 рæвдауæндоны.
