Уый ма йæхицæн ссардта зæрдæхæлар æмбал — кавказаг фыййау куыдз
Дзæуджыхъæуы хи хæдзары кæрты цы арсы лæппыны ссардтой, уый ныртæккæ йæхи ирхæфсы Мæскуыйы бынмæ. Уый ма йæхицæн ссардта зæрдæхæлар æмбал — кавказаг фыййау куыдз. Æппынæдзухдæр тезгъо кæнынц иумæ. Цæмæй ахæм зæрдæмæдзæугæ цæдис бахъахъхъæной, уый тыххæй сын парчы сарæзтой хицæн вольер. Бæлвырддæр радзурдзæн Хъайтмазты Дзерассæ.
Арсы лæппын Дынька ныртæккæ зæрдиагæй йæ рæстæг æрвиты Мæскуыйы бын. Кæд æмæ цалдæр мæйы размæ, цæрæгой кæй аирвæздзæн, ууыл ветеринартæ дызæрдыг кодтой. Апрелы фырвæллад сырды ссардтой Дзæуджыхъæуы кæрон. Тарст арсы лæппыны уайтагъд æрцахсын нæ бантыст. Аирвæзын æй кодта цæрæгойтæн æххуысы къорд «Бездомных нет. Владикавказ»-ы волонтер Плиты Маринæ. Цалынмæ бынæттон ветеринартæ иртæстой арсы лæппыны уавæр, уæдмæ Мæскуыйæ Ростовы областырдæм рацыд парк «Земля Прайда»-йы бындурæвæрæг Виктор Агафонов.
«Земля прайда» у, адæймагæй хъыгдард чи баййæфта кæнæ та æрдзы аирвæзыны гæнæн кæмæн нæй, ахæм хъæддаг сырдтæн уникалон парк. Ам ног хæдзар ссардтой дæсгай домбайтæ, æрсытæ, бирæгътæ, хъæддаг гæдытæ. Специалисттæ æркастысты Дынькамæ, снысан кодтой дзæбæх кæныны фæтк, фæлæ уæддæр æнæ мадæй лæппын æнкъард кодта. Уæд æй сфæнд кодтой базонгæ кæнын къæбыла Арбузикимæ.
Афтæ кавказаг фыййау куыдзы къæбыла сси арсы лæппыны хуыздæр хæлар. Ныр Мæскуыйы бын æрдзы хъæбысы Дынька æмæ Арбузик иумæ тезгъо кæнынц.
Дыууæ хæларæн сарæзтой хицæн вольер – Дынька къæбыламæ иннæ арсы лæппынты нæ уадзы. Хæры дыргътæ, хурмæ йæхи тавы, цардыл цин кæны æмæ парчы уазджыты хъæлдзæг кæны. Ацы хъуыддаг æнæ зæрдæхæлар адæмы æххуысæй къухы нæ бафтыдаид.
