Ацы куыст бакодтой социалон программæмæ гæсгæ
Мæздæджы районы æрдзон газ бауагътой 400-йæм хæдзармæ. Ацы куыст бакодтой социалон программæмæ гæсгæ. Æрдзон хорзæх лæвар бауадзынц участочы арæнты онг. Иуæй-иу категориты цæрджытæн та суанг сæ хæдзармæ. Темæйыл дарддæр радзурдзæн Чехойты Фатимæ.
Ныр ис хæринаг цæттæ кæнын, дон хъарм кæнын, иу ныхасæй, ис цæрæн, хæдзары куыд æмбæлы, афтæ. Марина Лабазановайы цинæн кæрон нæй. Аразы хæдзар йæ райсгæ сывæллæттæн – чызг æмæ лæппуйæн. Фæнды йæ, цæмæй сæ алкæмæн дæр уа йæхи тыгъдад, уыимæ кæрæдзимæ хæстæг куыд уой, афтæ.
Хæдзары æрдзон газ ссудзын бафæлварыны размæ специалисттæ сбæрæг кодтой кусæнгæрзты герметикон уавæр, стæй вентиляци. Амæй фæстæмæ æххæст кæнын хъæуы æдасдзинады домæнтæ. Хæдзæртты хицæуттæн кусæнгæрзтæ хи къухтæй цалцæг кæнæн нæй.
Æрдзон газимæ хæдзары фæзынд фыццаг цай фыцæн дæр. Уый, стæй цай нуазынæн сервиз дæр Маринæйæн балæвар кодтой газдæттæг куыстуаты специалисттæ.
Æрдзон газ бауагътой социалон программæ æххæстгæнгæйæ. Маринæ курдиат балæвæрдта 31-æм июлы. 10 боны фæстæ специалисттæ бавнæлтой куыстытæм. Æрдзон хорзæх хæдзары арæнты онг бауадзын у лæвар. Адæмы хицæн категоритæ та газ мидæмæ бауадзыны тыххæй райсынц фиддонтæ.
Маринæйы хæдзар, Мæздæджы районы æрдзон газ социалон программæмæ гæсгæ кæдæм бауагътой, уыдонæн у 400-æм. Ныр район æххæстæй сси газификацигонд. Æрдзон хорзæх уадзыны куыстытæ дарддæр цæуынц ног арæзт хæдзæртты арæнты онг.
