Стыр бæрæгбон баиу кодта, ирон бæгæны фыцыны æмæ национ хæринæгты традицитæ, адæмон æрмдæсныйæдтæ, музыкæ æмæ хореографи
Хатдзæгтæ скодтой Æппæтадæмон национ-культурон фестиваль-конкурс «Ирон бæгæны»-йæн. Стыр бæрæгбон баиу кодта, ирон бæгæны фыцыны æмæ национ хæринæгты традицитæ, адæмон æрмдæсныйæдтæ, музыкæ æмæ хореографи. Сæйраг фæзыл сæмбæлдысты, Цæгат Ирыстоны æппæт районты, стæй Хуссар Ирыстоны, Краснодары, Пятигорскы æвзарæн турты хуыздæр архайджытæ. Фестивальмæ æрбацыдысты Екатеринбургæй, Новороссийскæй, Ессентукийæ, стæй Канадæйæ, Кенийæ, Испанийæ, Германийæ æмæ Казахстанæй уазджытæ. Бæлвырддæр радзурдзæн Хъайтмазты Дзерассæ.
Ирæтты хсæн Советон Цæдисы фыццаг Хъæбатыр, номдзыд хæстон тæхæг Остъаты Алексейы фæдон Зауыр Дзæуджыхъæумæ Германийæ ссыд сæрмагондæй æппæтадæмон национ-культурон фестиваль-конкурс «Ирон бæгæны»-йы архайынмæ. Фыццаг хатт ирон бæгæны афæлвæрдта цалдæр азы размæ. Уæд сфæнд кодта ацы рагон аивадыл сахуыр уæвын. Нозты рецепт у сæ бинонты хæзна. Базыдта йæ йæ нанайæ. Конкурсы архайд ын у дебют бæгæныфыцæджы хуызы. Финалмæ лæмбынæгæй цæттæ кодта. Бæгæны сфыхта йæ нанайы рецептмæ гæсгæ, ирон чъиритæ та йæ мады амындмæ гæсгæ.
Германи, Канадæ, Испани, Казахстан, Кени. Фестивалы географи рагæй рацыд Цæгат Ирыстоны æмæ ма суанг Уæрæсейы арæнтæй дæр. Финалы сæмбæлдысты æвзарæн къæпхæнты хуыздæр архайджытæ. Арсæгты Еленæ конкурсы хъахъхъæны Дыгуры районы кад. Ирон бæгæны фыцын у йе рвылбон царды хай. Нозты рецепт не ргом кæны. Куыд зæгъы, афтæмæй уый у йæ бинонты сылгоймæгты цыппар фæлтæры фæллой, куыд сæрмагондæй финалмæ цы национ хæринæгтæ сцæттæ кодта, уыдон дæр.
Конкурсы хатдзæгтæм гæсгæ сбæрæг сты хуыздæртæ 2 номинацийы: хуыздæр ирон бæгæны æмæ национ хæринæгтимæ стъол. Æрвылазон æппæтадæмон фестиваль-конкурс хуымæтæг гастрономон ныхмæлæуд рагæй нал у. Æрмдæсныты равдысты сæ куыстытæ равæрдтой 50 мастеры. Се ппæтæн дæр сæ бон уыд тематикон дæсныйадæвдисæг ахуырты архайын.
Фестивалы истори райдыдта 2010-æм азы. Конкурс æрмæст рецептты ныхмæлæуд нæу. Ирон адæмы кæрæдзиуыл бæтты. Фидар кæны диаспорæты бастдзинад историон райгуырæн зæххимæ. Мадзалы хатдзæг бæлвырд у: нацийы культурон код æнусты нæ фесæфдзæн, цалынмæ сæйраг кувæн нозты æмæ национ хæринæгты рецепттæ фæлтæрæй фæлтæрмæ хæццæ кæной, уæдмæ.
