Сезоны райдиан специалисттæ цæстдарæн куыст фæкарздæр кæнынц поликлиникæты, скъолаты æмæ сывæллæтты рæвдауæндæтты
Уæрæсейы паддзахадон санитарон-эпидемиологон службæйыл сæххæст 104 азы. Сезоны райдиан специалисттæ цæстдарæн куыст фæкарздæр кæнынц поликлиникæты, скъолаты æмæ сывæллæтты рæвдауæндæтты. Профилактикон куысты тыххæй бæстондæр радзурдзæн Хъайтмазты Дзерассæ.
Эпидсезоны размæ санитарон-эпидемиологон службæйы специалисттæн бирæ куыст ис. Цæстдард сывæллæтты поликлиникæтæм дæр. Бæлвырд кæнынц привикæтæгæнæн журналтæ, вакцинæтæ дарыны уавæртæ æмæ цас сывæллæттæ райстой вакцинæ, уый. Ахæм бæлвырдгæнæн мадзæлттæ дæттынц, фиппаинæгтæ афоныл раиртасыны æмæ рынчынтæ кæй фæфылдæр уыдзысты, уымæ медицинон кусæнуатты цæттæдзинадæн аргъ скæныны фадат. Ацы куыстæй аразгæ у, æппæтæй чысылдæр пациентты бахъахъхъæныны фарста.
Эпидемиологон цæстдардмæ æрмæст бæлвырдгæнæн мадзæлттæ нæ хауынц. Специалисттæ цæст дарынц инфекцитæ куыд парахат кæнынц, уымæ, анализ кæнынц эпидемиологон уавæрæн, бæлвырд кæнынц профилактикон мадзæлттæ æмæ вакцинаци æххæст кæныны хъуыддаг. Ахсджиаг у, æрмæст низ раиртасын нæ, фæлæ йæ ма бауадзын апарахат уæвын. Уымæ гæсгæ мониторинг раздæрау у службæйы куысты сæйрагдæр къабæзтæй иу.
Ацы куысты нысаниуæг уæлдайдæр рабæрæг коронавирусы пандемияйы рæстæг. Уæд специалистты хъуыд æрвылбон кæсын уавæрмæ, иртасын инфекцийы уæзæгтæ æмæ вирус ма апарахат уæвынæн мадзæлттæ аразын. Абон сын уыцы фæлтæрддзинад æххуыс у сæ куысты. Ахуыры азы райдиан та специалисттæ ногæй кусынц скъолаты.
Сæрмагондæй ахæм æрвылбон профилактикон куыст дæтты, тæссаг уавæр афоныл сбæрæг кæныны фадат æмæ ма бауадзын инфекци апарахат кæнын. Сæ профессионалон бæрæгбоныл санитарон-эпидемиологон службæйы минæвæрттæ, традицимæ гæсгæ, æмбæлынц сæ куысты. Уымæн æмæ сæ архайд комкоммæ баст у адæмы æнæниздзинадимæ.
