Ног сезон та байгом кæнынмæ хъавынц 3-æм октябры
Евгений Вахтанговы номыл Академион Уырыссаг театр сбæрæг кодта йæ юбилей. Сæххæст 155 азы, бындур ын æвæрд куы рцыд, уæдæй. Уыцы мгъуыдмæ сси нæ республикæйы культурон фидауц. Йæ фыццаг постановкæ уыд 1871-æм азы, Лермонтовы «Маскарад». Ныртæккæ йæ репертуары ис уырыссаг, ирон æмæ фæсарæйнаг классикæ, æмæ дарддæр хæццæ кæны йæ хуыздæр традицитæ. Ног сезон та байгом кæнынмæ хъавынц 3-æм октябры. Хъайтмазты Дзарæссæйæн ныхасы бар.
Уырыссаг академион театры аивадон разамонæг Владимир Уваров æмæ Ярославлæй Федор Волковы номыл театры разамонæг Валерий Кириллов бафыстой æмгуыстады тыххæй меморандум. Уымæ гæсгæ æнгом æмархайд кæндзысты культурæйы, аивады æмæ рухстауынады къабазы. Ацы хъуыддаг сбастой 2 юбилеимæ – Вахтанговы номыл театры 155 азимæ æмæ Волковы номыл театры 275 азимæ.
155 азы. Уыцы рæстæгмæ ам сæ курдиат æвдыстой бирæ зындгонд культурæйы архайджытæ. Сæрмагондæй ам агуырдта йæ театралон философи Евгений Вахтангов, Михаил Булгаков та, медицинæ ныууадзгæйæ, кодта фыццаг къахдзæфтæ аивады. Номдзыд Хетæгкаты Къоста театры куыста нывгæнæг-декораторæй.
Аивадуарзджытæн бацæттæ кодтой æцæг поппури Уырыссаг театры спектакльтæй. Юбилейон изæры актертæн æмæ уазджытæн раарфæ кодтой Цæгат Ирыстоны сæргълæууæг Сергей Меняйло æмæ Парламенты сæрдар Тускъаты Таймураз.
Театры актерты æмæ кусджыты схорзæхджын кодтой кады гæххæттытæй.
155 азы хатдзæгтæ сты сæдæгай спектакльтæ, мингай аивадуарзджытæ, цалдæр фæлтæры актертæ. Уæды хуызæн ныр дæр ног сезон райдайдзысты Лермонтовы «Маскарад»-æй, фидæнмæ труппæмæ ис стыр нысантæ.
Æмæ ацы хъуыддаг къухы кæй бафтдзæн, уый дызæрдыггаг нæу.
