Депутаттæ æркастысты районы социалон-экономикон райрæзтмæ, бюджетмæ æмæ туристон къабазы куыстмæ
Æрæфы районы уыд парламенты Советы æмбырд. Депутаттæ æркастысты районы социалон-экономикон райрæзтмæ, бюджетмæ æмæ туристон къабазы куыстмæ. Парламенты сæрдар Тускъаты Таймураз бабæрæг кодта цалдæр социалон объекты, аргъ скодта куыстуæтты архайдæн æмæ сæмбæлд æхсæнады минæвæрттимæ. Бæлвырддæр радзурдзæн Хъайтмазты Дзерассæ.
Тускъаты Таймураз районы культурæйы галуаны къордтæ баййæфта репетициты рæстæг. Кусæнуат æххæст у хъæугæ ифтонггæрзтæй, бæстыхай та бындуронæй сцалцæг кодтой 7 азы размæ. Абон галуан иу кæны æппæт Æрæфы районы хъæуты культурæйы хæдзæрттæ. Уыдоны кусы 66 иугонды, архайы дзы алы кары 700 адæймаджы онг.
Парламенты спикер бабæрæг кодта Цыколайы 2-æм скъолайы бындурыл гом хуызы физкультурон-дзæбæхгæнæн комплекс дæр. Ног фæз зæронды бынаты сарæзтой фарон программæ «Хъæуты территориты комплексон райрæзт»-мæ гæсгæ. Уый сси æцæг лæвар ахуырдзаутæн. Ам фæзынд аразгæ уæлцъаримæ згъорæн фæндаг, воркаутæн æмæ баскетболæн фæзтæ. Футболон дæр ис, фæлæ ма йыл хъæуы бакусын. Ахæм курдиатимæ Тускъаты Таймуразмæ фæсидтысты скъолайы педагогтæ.
Сырх-Дыгуры та парламенты сæрдарæн радзырдтой Курчатовы къласы куысты тыххæй. Байгом æй кодтой 3 азы размæ æмæ фыццаг ахуырдзаутæн ныридæгæн ис æнтыстдзинæдтæ. Арфдæр ахуыр кæнынц æрдзон-наукон дисциплинæтæ. Уый сын æххуыс кæны техникон зонындзинæдтæ исын æмæ фидæны æвзарын инженерон дæсныйæдтæ. Абон уыдон нæ фаг кæнынц. Тускъаты Таймураз фæсидт ацы фарстайыл комплексон куыст кæнын æмæ уæлдæр ахуыргæнæндæттимæ æмархайд кæнын. Спикерæн ма цымыдисаг уыд, кълæсты куратортæ сæ размæ цавæр нысантæ æвæрынц, уый.
Ахуыргæнæндоны бæстыхай ног у. Арæзт уыд 2018-æм азы. Уыимæ скъолайæн йæхи истори æнусон юбилеймæ æрбахæстæг кæны. Сырх-Дыгуры фæзынд 1935-æм азы. Уыцы рæстæгмæ ардыгæй, уарзон хъæуæн кад чи кæны, ахæм ахуырдзаутæ чысыл нæ рацыд. Ууыл дзурæг у музей. Æмбырд дзы сты бæстæзонæн æмæ патриотон æрмæджытæ. Уый у педагогты æмæ скъоладзауты иумæйаг куыст.
Парламенты Советы æмбырды æркастысты районы социалон-экономикон райрæзтмæ. Тускъаты Таймуразы ныхæстæм гæсгæ, хуыздæр кæнынц сæйраг бæрæггæнæнтæ. Спикер ма фæнысан кодта, муниципалон бюджеты æфтиæгты хай кæй бæрзонддæр кæны. Туристон къабаз районы у сæйрагдæртæй иу. Агропромышленнон комплексы райрæзтмæ та хъæуы фылдæр æргом аздахын.
Тускъаты Таймураз сæмбæлд районы æхсæнады минæвæрттимæ дæр. Йæ цард фæллойæн чи снывонд кодта æмæ йæ дæсныйадыл зæрдæ чи нæ сивта, уыцы адæм. Уыдон сты педагогтæ, медиктæ, социалон, физкультурон-дзæбæхгæнæн æмæ хъæууон хæдзарады къабæзты кусджытæ. Се ппæтæн дæр саккаг кодтой парламенты кады гæххæттытæ.
