Се спортивон цæттæдзинад дзы равдыстой Цæгат Ирыстоны, Стъараполы крайы æмæ Хъæрæсе-Черкесийы минæвæрттæ
Дзæуджыхъæуы ацыд регионты хсæн турнир волейболæй, сæрмагонд æфсæддон операцийы ветеранты архайджытимæ. Се спортивон цæттæдзинад дзы равдыстой Цæгат Ирыстоны, Стъараполы крайы æмæ Хъæрæсе-Черкесийы минæвæрттæ. Ветерантæ сæхи бæстон бацæттæ кодтой, æмæ турниры бацахстой 1-аг бынат. Ерыстæ саразыныл бакуыстой «Фыдыбæстæ хъахъхъæнджыты» фонды регионалон хайад стæй физкультурæ æмæ спорты министрад. Чехойты Фатимæ радзурдзæн бæстондæр.
Ног хуызы ног ахастимæ. Уæззау цæфты фæстæ сабыр царды фидар къахдзæфтæ кæнын чи райдыдта, уыцы волейболисттæн спортивон фæзмæ сæ алы рацыд дæр у æнтыстдзинад. Ахæм рауад йæ цардвæндаг командæйы капитан Годжыцаты Сосланæн дæр. 2022-æм азы, сæрмагонд æфсæддон операцийы архайæг уæвгæйæ, фæци уæззау цæф, ныр та йæхæдæг æххуыс кæны командæйæн йæ фыццаг ерыстæм цæттæ кæнынæн.
Ерыстæм цæттæ кæныны рæстæг æрмæст архæстдзинад æмæ командæимæ иумæйаг куыст нæ домы, фæлæ профессионалон ифтонгдзинад дæр. Мæхъиты Зурабы хæрзаудæн фонд «Фарн» спортсментæн балæвар кодта формæ, сертификацигонд пуртитæ æмæ æндæр хъæугæ ифтонггæрзтæ.
Ныр командæйæн фадат ис йæ цæттæдзинад равдисынæн. Дзæуджыхъæуы фыццаг хатт арæзт æрцыдис регионты *хсæн турнир волейболæй бадгæйæ. Йæ архайджытæ уыдысты хæстон цауты ветерантæ. 2-æм спортивон скъолайы фæзы уæлахиздзаутæ суæвыныл ерыс кодтой Цæгат Ирыстоны, Стъараполы крайы æмæ Хъæрæсе-Черкесийы минæвæрттæ. Турнир сарæзтой Республикæйы спорты министрад, «Фыдыбæстæ хъахъхъæнджыты» фонды регионалон хайад æмæ йæ астæуыстæг хъыгдард кæмæн у, уыцы адæмы спорты Федераци.
Волейбол бадгæйæ ветерантæн æххуыс у се *нæниздзинад фидар кæнынæн, командæимæ кусын арæхсынæн æмæ активон цардмæ раздæхынæн. Республикæйы лæмбынæг цæстдард цæуы иннæ паралимпаг къабæзтæм дæр, ерыстæ та сæ архайджытæн свæййынц хорз фадат хи равдисынæн æмæ бæрзонддæр къæпхæнмæ схизынæн.
Ацы спортсментæн турнир æрмæст кубок рамбулынæй ерыс нæу. Хорз фадат у хæлардзинад банкъарынæн, нысантæ *вæрынæн æмæ сæ иумæйагæй æххæст кæнынæн.
