Æркастысты ахуыргæнæндæтты уавæртæм Хъарман-Сындзыхъæуы æмæ Дур-Дуры
Дыууæ хъæуккаг рæвдауæндоны мониторинг скодтой Адæмон фронты активисттæ. Æркастысты ахуыргæнæндæтты уавæртæм Хъарман-Сындзыхъæуы æмæ Дур-Дуры. Ацы кусæг балцмæ æхсæнадон кусджытæ рагæй цæттæ кодтой, уымæн æмæ ахсджиаг социалон объектты арæзтад райдыдта сæ активон архайдæй. Цавæр хатдзæгтæ скодтой бæрнон кусджытæ, уый тыххæй радзурдзæн Чехойты Фатимæ.
Сывæллæтты рæвдауæндомæ æркаст райдайы, куыд фæзæгъынц, къæсæртæй. Æдасдзинады системæ, быруйы уæлвæзад — алцыдæр дзуапп дæтты домæнтæн, зæгъынц Адæмон фронты эксперттæ. Æмæ эксурси мидæгæй бæстыхайы. Скъолайы агъоммæйы ахуырадон куыстуат Хъарман-Сындзыхъæуы сарæзтой 2022-æм азы, национ проект «Демографи» æххæстгæнгæйæ. 5 азы эксплуатацийæн æвдисæн æрмæстдæр къулсæрсты чысыл скъуыдтытæ. Уыдон сраст кæнæн ис , зæгъы сæргълæууæг. Иннæ хъуыддæгтæй бæстыхай у ноджы хуызон.
Рæвдауæндон арæзт у 120 хъомылгæнинагæн, ныртæккæ дзы ис 115 сывæллоны. Адæмон фронты активисттæ сæ баййæфтой фынæйæ, уый тыххæй æркаст цыдис сæрмагонд уавæрты, сабырдзинад хъахъхъæнгæйæ. Бакастысты актон залмæ, уыцы иу рæстæг у спортивон дæр, федтой хæринаггæнæн дæр.
Рæвдауæндоны ис 5 къорды. Хъомылгæнджытæ кусынц полилингвалон программæмæ гæсгæ, æххæст кæнынц федералон проект «Алы сывæллоны æнтыстдзинад» дæр. Алфамблай территори дæр у нывыл. Æххæст у хъазæн фæзæй, ис дзы беседкæтæ дæр. Æцæг, уыдонмæ бацæуынмæ къахвæндæгтæ нæй, хъæуы кæрдæгыл бацæуын, кæрдын æй арæх фæхъæуы. Рæвдауæндоны кусджыты ныхæстæм гæсгæ, уыцы уавæр æнцонвадат нæу.
Дур-Дуры рæвдауæндонмæ та Адæмон фронты минæвæрттæ æрцыдысты лæвæрттимæ. Уымæн æмæ сæ суазæг кæндзысты ног бæстыхайы. Байгом ис мæйы размæ. Рæвдауæндон арæзт æрцыдис хъæууон хæдзарадон министрады «Хъæуккаг территориты комплексон рæзт»-ы программæмæ гæсгæ. Бæстыхайы кусдзысты 5 къорды, ныридæгæн уал дзы ис 4. Уый тыххæй уазджытæн радзырдта куыстуаты сæргълæууæг.
Ног бæстыхайы архайынц активонæй — арæзт сты æппæт уавæртæ. Цæмæй афтæ уа, уымæн йе ххуысы хай бахаста Адæмон фронт дæр. Раздæр рæвдауæндоны куыст цыдис, домæнтæн дзуапп чи нæ лæвæрдта, ахæм зæронд хæдзары. Йæ уавæр хуыздæрхъуаг кæй у, уый Адæмон фронты минæвæрттæ сбæрæг кодтой 4 азы размæ. Хъæуæн баххуыс кодтой ацы фарст алыг кæнынæн. Ныртæккæ зæронд агъуыстытæн æвдисæн — ноджы фойейы цы макет ис, æрмæстдæр уый.
Рæвдауæндон кусы 4 ахуырадон программæ гæсгæ. Хъомылгæнинæгты *хсæн — æвзонг экологтæ, кадеттæ, шахматисттæ, шашкæтæ чи уарзы, стæй мадæлон æвзаг арф чи ахуыр кæны, ахæмтæ. Уæлдай цæстдард цæуы патриотон хъомыладмæ. Ис дзы музей æмæ психолоджы кабинет, территорийы та хъуамæ фæзына æцæг автодром.
Куыд рабæрæг, афтæмæй беседкæтæ арæзтадон проектмæ хаст нæ уыдысты, кæд территорийы ас уымæн фадат дæтты, уæддæр. Адæмон фронты эксперттæ æнæ уынгæ нæ фесты, рæвдауæндонмæ базилæнтæ асфальт конд кæй не сты, уый. Стæй ма рудзгуытыл аууондæттæг æмбæрзæнтæ кæй нæй, уый дæр. Иннæ хабæрттæ æххæст сты æппæт уавæртæй, уыимæ дыууæ рæвдауæндоны дæр.
Адæмон фронт активонæй мониторингтæ кæны республикæйы ахуырадон куыстуæтты. Эксперттæ сбæрæг кæнынц объектты уавæр æмæ куысты фадæттæ. Æрмæст хъæндзинæдтæ нæ иртасынц, фæлæ стыр æвæрæн хæссынц сæ аиуварс кæнынмæ.
