Уый тыххæй ныхас цыди Хицауады æмбырды
100 милуан сомы ацы аз дихгонд æрцæудзæн сæкæрниз, онкологон, зæрдæ æмæ тугдадзинты низты ныхмæ тох кæныны регионалон программæтæ æххæст кæнынæн. Уый тыххæй ныхас цыди Хицауады æмбырды. Боны фæткмæ цы фарстатæ хаст æрцыди, уыдонæй иу баст уыди, хъахъхъæд цы æрдзон территоритæ цæуы, уыдоны республикон закъонмæ ивддзинæдтæ бахæссын. Профилон министр куыд фехъусын кодта, афтæмæй ныр ахæм территориты æрдз хъахъхъæныны фæтк фæкарздæр уыдзæн. Социалон лæггæдты æмвæзад фæуæлдæр кæныныл дзургæйæ, фæнысан кодтой, паддзахадон æмæ муниципалон лæггæдты бирæвæрсыг центрты куыст фæахадгæдæр кæнын. Хаст æрцыди аграритæн æххуыс кæныны уынаффæ дæр. Æххуыс кæнынц халсарты, мыггæгты æмæ фосдарынады къабæзтæн. Ацы аз сын дихгонд æрцæудзæн 40 милуан сомы. Хицауады уæнгтæ хорзыл банымадтой бæлццæттæ ласыны къабазы рæзтыл бакусын дæр. Федералон программæйы фæлгæты регионы æххæстгонд цæуы сæрмагонд мадзæлтты комлекс, иууылдæр баст сты адæмы ласыны фарстатæ фæхуыздæр кæнынимæ. Транспортон реформæ арæзт цæуы республикæйы сæргълæууæджы хъæппæрисæй.
