Ныридæгæн бавнæлдтой хурныгуылæны трибунæйы конструкцитæ аразынмæ
Хорз боныхъæдыл канд республикæйы цæрджытæ нæ цин кæнынц, фæлæ ма стадион «Спартачы» кусджытæ дæр. Уымæн æмæ боныхъæд ахады куыстыты цыдыл. Стадионы уыдзæн дон пырхгæнæн æмæ хъармгæнæн системæтæ. Арæзтадон куыстытæ фæуыдзысты 2024-æм азы, майы. Цавæр куыстытæ фесты, æмæ ма цæуыл бакусын хъæуы, уый тыххæй радзурдзæн Тъехты Элинæ.
Ацы ран куыст цæуы æнæрлæугæйæ. 120 специалистæй фылдæр алы бон дæр фæллой кæнынц стадион «Спартачы». Ныридæгæн бавнæлдтой хурныгуылæны трибунæйы конструкцитæ аразынмæ. Хурыскæсæны та аразынц трибунæтæ. Арæзтадон куыстыты хицау Дзæгъойты Георгий куы зæгъы, афтæмæй хорз боныхъæд хорз ахады куыстыты цыдыл.
Стадионыл нырма бирæ куыст ис. Зæгъæм, хурныгуылæн трибунæйы хъæуы саразын инженерон коммуникацитæ, стæй бырутæ. Уымæй уæлдай ма æнæмæнг хъæудзæн стадионы территоримæ базилын æмæ йæ срæсугъд кæнын. Уыцы куыстытæ та райдайдзысты уалдзæджы.
«Спартачы» стадионы уыдзæн дон пырхгæнæн æмæ хъармгæнæн системæтæ. Куыстытæм бавналдзысты 10 боны æмгъуыдмæ. Республикæйы сæргълæууæджы уынаффæгæнæг Моргуаты Константин куыд зæгъы, афтæмæй футболон фæзыл архайдзысты, бæстæйы чемпионатмæ футболæй Уæрæсейы фæзтæ чи цæттæ кодта, ахæм специалисттæ. Хæстæгдæр рæстæг кусын райдайдзæн сæрмагонд техникæ дæр.
Цалцæггæнæн куыстытæ фæуыдзысты 2024-æм азы, 15-æм майы. Сæрды та футбол уарзджытæн фадат уыдзæн футболон командæ «Алани»-йы хъазтмæ бакæсынæн хи стадионы.
