Ууыл ныхас цыд республикæйы ахуыргæнæндæтты модернизацийы фарстаты фæдыл æмбырды
2024-æм -2026-æм азты Цæгат Ирыстоны бындурон цалцæгмæ курдиæттæ цы 47 скъолайы балæвæрдтой, уыдон банымадтой хорзыл, æмæ ма уыцы куыст цæуы дарддæр. Ууыл ныхас цыд республикæйы ахуыргæнæндæтты модернизацийы фарстаты фæдыл æмбырды. Амыдтæ йæ премьер Дзанайты Барис. Æмбырды архайджытæ æрдзырдтой объектты бындурон цалцæгыл, стæй алыхуызон программæты архайыныл. Хицауады сæрдар куыд бафиппайдта, афтæмæй регионы разамонæг Сергей Меняйлойы амындмæ гæсгæ республикæ архайы скъолаты бындурон цалцæджы федералон программæйы. 2022-2023-æм азты хатдзæгтæм гæсгæ, нæ регионы сног кæндзысты 66 объекты. Сæ иумæйаг аргъ 4 миллиард сомы. Хицауады сæрдары хæдивæг – арæзтады æмæ архитектурæйы министр Атарты Георгий куыд радзырдта, афтæмæй ныридæгæн бындурон цалцæг фæци объектты фылдæр хайы. Чи ма баззад, уыцы скъолаты та куыстытæ кæронмæ фæхæццæ кæнынц. Абон программæйæн ис хорз хатдзæгтæ скæнæн. Цæгат Ирыстоны ахуырады министрад хъуамæ æнгомдæр архайа федералон æмкусджытимæ, – загъта Дзанайты Барис. Уæ зæрдыл уын æрлæууын кæндзыстæм, республикæйы Сæргълæууæг Сергей Меняйло бабар кодта бацæттæ кæнын æмбæлгæ гæххæттытæ, цæмæй бындурон цалцæг скæной рæвдауæндæтты æмæ астæуккаг профессионалон ахуыргæнæндæтты. Бæлвырд программæтæ рæхджы скусдзысты Уæрæсейы. Уымæ гæсгæ арæзтады министрад æмæ районты сæргълæуджытæ хъуамæ иумæ бакæной цæттæгæнæн куыст. 33 рæвдауæндонæн абоны онг сметон документаци конд æрцыд.
