Æппæтадæмон культурон-патриотон центр «Беслæн. 1-æм скъола»-йы фæстаг 6 мæймæ байгом 15 ног залы
22 азы фæстæ Беслæны дарддæр хъахъхъæнынц, скъолайы спортзалæй чи нал рацыд, уыдоны тыххæй намыс. Æппæтадæмон культурон-патриотон центр «Беслæн. 1-æм скъола»-йы фæстаг 6 мæймæ байгом 15 ног залы. Сæмбырд дзы кодтой архивон кадртæ, чи фæмард, уыдоны дзаумæттæ, слесты æрмæджытæ æмæ уыцы уæззау 52 сахаты æвдисæнтæ. Проекты сæйраг хæс у трагедийы тыххæй рæстдзинад бахъахъхъæнын æмæ йæ иннæ фæлтæртæм фæхæццæ кæнын. Бæлвырддæр радзурдзæн Хъайтмазты Дзерассæ.
Ацы скъола сси нырыккон историйы карздæр трагедитæй иуы символ. Ам дарддæр хъахъхъæд цæуы, 2004-æм азы 3-æм сентябры спортзалæй чи нал рацыд, уыдоны тыххæй намыс. Ныр терроризмы профилактикæйы æппæтадæмон центр «Беслæн. 1-æм скъола»-йы æрмæст зонгæ экспозицитæ нæй. Трагедийы 22 азмæ сног кодтой ныр чи архайы, уыдон, стæй байгом кодтой ног тематикон залтæ. Фæстаг 6 мæймæ бацæттæ кодтой 15 ног экспозицийы. Æдæппæтæй центры сты 20.
Ам ма дзурынц, спортзалы сывæллæттæ кæрæдзийæн ныфсытæ куыд лæвæрдтой, уый тыххæй дæр. Кæд тарстысты, уæддæр архайдтой сæ фарсмæ чи ис, уыдонæн æххуыс кæныныл. Сывæллæтты ныфсхастдзинады истори ам сси æндæр радзырды хай – Цæгат Ирыстоны национ хæзнаты тыххæй.
Трагедийы рæстæг фæмардысты æнæхъæн бинонтæ: хистæртæ, ныййарджытæ, сывæллæттæ. Аскъуыд, хистæртæ кæстæртæй раздæр куы ацæуынц, фæлтæрты уыцы бастдзинад. Ног залы ис ирон авдæн. Æвæрд дзы сты сабийы худ æмæ хъæццул. Уыдысты, трагедийы аирвæзын кæмæн нæ бантыст, уыцы сывæллæтты. Ам фехъусæн ис, мады ныхас телефонæй, цы хъæбул ын фæмард, уыимæ. Æцæг фыст нæу, аивадон реконструкци.
Сæйраг ноггонд хайæдтæй иу у уыцы цауты цæстуынгæ шкала. Хронологи баххæст кодтой ног оперативон кадртæй, сбæрæг сты, раздæр зындгонд чи нæ уыдысты, уыцы хуызистыты автортæ, снысан кодтой, уыцы бонты чи куыста, уыцы журналистты нæмттæ.
Хицæн зал баст у, террористтæ скъола бацахсынмæ куыд цæттæ кодтой, уыимæ. Ардæм 2 мæйы размæ Слестгæнæн комитет Мæскуыйæ æрбарвыста æцæг цæстуынгæ æвдисæнтæ слесты æрмæджытæй. Рацитæ, хæстфæрæзтæ, хиконд рæмудзæн æрмæджытæ. Экспонатты хсæн террористтæ цы машинæйыл æрбацыдысты, уый æцæг номыртæ дæр.
Сног кодтой, уыцы бонты скъолайы цы тыгъдадтæ уыд, уыдон дæр. Ахуыргæнджыты кабинет – террористтæ хабæрттæм кæм кастысты æмæ дарддæр куыд архайын хъæуы, уый кæм нысан кодтой, уыцы бынат. Ис, сæрмагонд дæлхайæдтæ «Альфа» æмæ «Вымпел»-ы архайджыты номыл экспозици. Формæ, хуызистытæ, биографитæ, æндæр операциты æмæ спортзалæй адæмы уæгъдгæнгæйæ куыд фæмардысты, уый тыххæй информаци. Сног кодтой хæрæндон дæр. Æппæтæй карздæр тох кæм уыд, уыцы бынат.
Ам алы æрмæг дæр у уыцы цауты æвдисæн. Проект «Сохранение памяти» сæххæст кæнын бантыст «Беслæны мадæлты» комитеты фæрцы. Царды йæ рауадзын баххуыс кодтой федералон æмвæзадыл дæр, æмæ республикæйы разамынд дæр. Йæ сæйраг нысан у, цæмæй уыцы трагеди рох ма уа, æмæ йæ намыс æххуыс кæна, ногæй та ахæм цаутæ ма æруадзын.
