Арæзт æрцæудзæн Красноярскы ног къуырийы
34 ирыстойнаг спортсмены архайдзысты Иван Ярыгины номыл традицион турниры уæгъдибар хъæбысхæстæй. Арæзт æрцæудзæн Красноярскы ног къуырийы. Не мзæххон богæлттæ сæ хъарутæ бафæлвардзысты æппæт уæзы категориты. Цæгат Ирыстоны иугонд командæ арвыста дыууæ тренировкæтæгæнæн æмбырды. Сæйраг тренер Кцойты Сосланы хъуыдымæ гæсгæ, спортсментæ иттæг хорз цæттæ сты. Уæмæ гæсгæ зæрдæ дарæн ис хорз бæрæггæнæнтыл. Ивгъуыд аз, алы ерысты хатдзæгтæм гæсгæ, ирыстойнаг богæлттæ Иван Ярыгины номыл турниры рамбылдтой 3 сызгъæрины, 2 æвзисты æмæ 8 бронзæ майданы. Уæ зæрдыл уын æрлæууын кæндзыстæм, дыууæ хатты Олимпаг чемпион, дунейы æмæ Европæйы чемпион, Советон Цæдисы спорты сгуыхт мастер Иван Ярыгины номарæн ерыстæ снысан кодтой 1990-æм азы. Фыццаг ерыстæ ацыдысты Абаканы. 1991-æм азæй фæстæмæ та турнир арæзт фæцæуы Красноярскы. Зæгъдзыстæм ма уый дæр, æмæ ацы аз номарæн турнир цæудзæн 35-æм хатт.