Традицион номарæн ерыстæ цæуынц Красноярскы, æмæ дзы архайынц 24 бæстæйы минæвæрттæ
34 цæгатирыстойнаг спортсмены архайдзысты Иван Ярыгины Кубок рамбулыны турниры. Традицион номарæн ерыстæ цæуынц Красноярскы, æмæ дзы архайынц 24 бæстæйы минæвæрттæ. Уый нымад у рекордыл. Иван Ярыгины турнирæй алы аз дæр райдайы хъæбысæй хæцыны сезон. Не мзæххон богæлттæ сæ хъарутæ бафæлвардзысты æппæт уæзы категориты. Цæгат Ирыстоны иугонд командæ арвыста дыууæ тренировкæтæгæнæн æмбырды. Сæйраг тренер Кцойты Сосланы хъуыдымæ гæсгæ, спортсментæ иттæг хорз цæттæ сты. Уæмæ гæсгæ зæрдæ дарæн ис хорз бæрæггæнæнтыл. Ивгъуыд аз, алы ерысты хатдзæгтæм гæсгæ, ирыстойнаг богæлттæ Иван Ярыгины номыл турниры рамбылдтой 3 сызгъæрины, 2 æвзисты æмæ 8 бронзæ майданы. Уæ зæрдыл уын æрлæууын кæндзыстæм, дыууæ хатты Олимпаг чемпион, дунейы æмæ Европæйы чемпион, Советон Цæдисы спорты сгуыхт мастер Иван Ярыгины номарæн ерыстæ снысан кодтой 1990-æм азы. Фыццаг ерыстæ ацыдысты Абаканы. 1991-æм азæй фæстæмæ та турнир арæзт фæцæуы Красноярскы. Зæгъдзыстæм ма уый дæр, æмæ ацы аз номарæн турнир цæуы 35-æм хатт. Фыццаг майдантæ райсыныл спортсментæ архайдтой æртæ рог категорийы. 61 килограммы онг уæзы йæ тыхтæ бафæлвæрдта Сабанты Алик. 70 килограммы онг уæзы та ерыс кæндзысты Быгъуылты Зауырбег, Сечъынаты Георгий, Дзигойты Зауыр æмæ Куыдзойты Алан.
