Сывæллæтты сæ профессионалон сусæгдзинæдтимæ зонгæ кæнынц журналисттæ, блогертæ, медиа къабазы алы хуызты минæвæрттæ
35 скъоладзауы сты лагерь «Звездочкæ»-йы æрыгон журналистты радон фæлтæр «Media camp»-ы архайджытæ. Сывæллæтты сæ профессионалон сусæгдзинæдтимæ зонгæ кæнынц журналисттæ, блогертæ, медиа къабазы алы хуызты минæвæрттæ. Проект æххæстгонд цæуы Цæгат Ирыстоны мыхуыры æмæ дзыллон коммуникациты комитеты руаджы, журнал «Ногдзау»-имæ иумæ. Бæстондæр радзурдзæн Чехойты Фатимæ.
ПТРК «Алани»-йы национ равдыстыты службæйы амонæг Гаглойты Светланæйы размæ ацы хатт – ног хæс. Куысты фарстытæ кæд йæхæдæг фæдæтты, уæд ныр та – тематикон лагеры æрыгон журналисттæ. Йæ дæсныйад æвдисæн ахуыры Гаглойты Светланæ бацамыдта, телевизормæ кæсдджытæн цæмæй равдыст цымыдисаг уа, уый тыххæй кадры куыд кусын хъæуы, студийы уазджытимæ куыд ныхас кæнын хъæуы, уыдæттæ. Зæрдиагæй раргом кодта дæсныйады сусæгдзинæдтæ. Профессионалон журналисты ныхæстæм гæсгæ, фидæны æрыгон æмкусджытимæ æргом ныхас кодта, йæхи зондамонджытимæ куысты фæлтæрддзинад йæ зæрдыл даргæйæ. Тематикон лагерь байгом 6-æм хатт. Ацы аз йæ архайджытæ сты 35 скъоладзауы. Уыдонæй иу Фæрниаты Амелия ныр 4-æм хатт æрбацыд. Йæ фыстæджытæ йын бакæсæн ис газет «Чемпион Иры»- фæрстыл. Ис æм Цæгат Ирыстоны æрыгон журналисты æвдисæндар. Йæ цард фæнд кæны журналистикæимæ бабæттын.
Проект æххæстгонд цæуы республикæйы мыхуыры æмæ дзыллон информациты комитет æмæ журнал «Ногдзау»-ы руаджы. Программæ алы аз дæр æрцæуы ивд. Ацы хатт, дæнцæгæн, журналисттæй уæлдай спикерты хуызы æрбахуыдтой блогерты дæр. Сæрмагонд цæстдард – национ дзыллон информацион фæрæзтæм. Сывæллæтты дæсныйадимæ зонгæ кæнынæн нырыккон форматтæ – ноджыдæр ма иу ногдзинад.
Лагеры фæлтæр аххæсдзæн 19 июлы онг. Фæлæ сывæллæттæ хæрзбон нæ зæгъынц. Дзурынц – нæ ног фембæлдмæ, фидæны аз.
