Экологон акци арæзт æрцыд республикæйы Сæргълæууæджы хъæппæрисмæ гæсгæ
50 заз бæласы талайы ныссагътой Дзæуджыхъæуы Сапицкийы фæлладуадзæн бынаты. Экологон акци арæзт æрцыд республикæйы Сæргълæууæджы хъæппæрисмæ гæсгæ, æмæ баст уыд адæмты иудзинады бонимæ. Мыггæгтæ æрзайын кодтой Елхоты хъомылгæнæн таладоны. Хъуамæ хорз фæхæцой, уымæн æмæ ацы бæлæсты мыггæгтæ æрдзы цыфæнды уавæртæн дæр фæразон сты, – зæгъынц специалисттæ. Талатæ кæм сагътой, уыцы бынæттыл рагагъоммæ ныккодтой хъацæнтæ. Бæлæстæ садзыны хъуыддаджы архайдтой Кæсæг-Балхъарæй специалисттæ. Хъæппæрисджын къорды уæнгтæ куыд загътой, афтæмæй фидæны Сапицкийы фæлладуадзæн бынат хъуамæ суа экологон парчы хуызы. Уыдзæн дзы фистæгæйцæуджытæн æмæ велосипедтæн фæндæгтæ, бандæттæ беседкæтæ, спортивон æмæ сывæллæтты ирхæфсæн фæзтæ, рухсгæнæн æмæ видеоцæстдарды системæтæ. Ландшафты дизайн-пълан саразыныл архайдтой Цæгат Кавказы арæзтадон техникумы студенттæ, фидæны архитектортæ. Рæхджы ацы бынаты фæзындзæн дыууæ гектарæй фылдæры фæзуаты ботаникон цæхæрадон. Ныртæккæ йæ тæмæны бацыдысты санитарон куыстытæ. Калынц зæронд æмæ хус бæлæстæ. Ацы азы райдианæй парчы территорийæ раластой 400 машинæйæ фылдæр хус къалиутимæ æмæ æндæр бырæттимæ.
