Республикæйы скъолатæй хуыздæр бæрæггæнæнтæ чи равдыста, уыдон райстой Цæгат Ирыстоны сæргълæууæг Сергей Меняйлойæ гранттæ
60 милуан сомы ахуырадон организациты кусджыты разæнгард кæнынæн. Республикæйы скъолатæй хуыздæр бæрæггæнæнтæ чи равдыста, уыдон райстой Цæгат Ирыстоны сæргълæууæг Сергей Меняйлойæ гранттæ. Хуыздæрты æвзаргæйæ, цæст дардтой алыхуызон бæрæггæнæнтæм. Зæгъæм, скъоладзауты архайд олимпиадæты, сæ спортивон æнтыстдзинæдтæ, профилон æмæ уæлæмхасæн ахуырады программæтæ царды уадзыны хатдзæгтæ. Бæлвырддæр радзурдзæн Хъайтмазты Дзерассæ.
Луначарскийы номыл 5-æм гимназ йæ кадджын ном бахъахъхъæдта. Сси республикæйы хуыздæр скъола горæты скъолаты хсæн æмæ райста грант Цæгат Ирыстоны сæргълæууæг Сергей Меняйлойæ – 5 милуан сомæй фылдæр.
5-æм гимназ гранттæ бирæ хæттыты æмбылдта. Зæгъæм, раздæр цы фæрæзтæ райстой, уыдонæй балхæдтой сæрмагонд ифтонггæрзтæ. Фæлæ сæрмагондæй ахуыргæнджыты разæнгард кæнынæн грант фыццаг хатт радих кодтой.
Бæстæйы цалдæр регионы ныридæгæн ис, субъекты разамонæг хуыздæр скъолатæн гранттæ куы радих кæны, ахæм фæлтæрддзинад. Фыццаг хатт ахæм системæ скуыста Цæгат Ирыстоны дæр. Уый уыд Сергей Меняйлойы хъæппæрис.
Камбилеевскæйы фыццаг скъола дæр райста грант. Ахуыр дзы кæны 846 сывæллоны. Ам ис 8 медалисты, 17 ахуырдзауы райстой сыгъзæрин майдантæ ГТО-йæ. Æрыгон педагог Козаты Виктория ацы аз фæуæлахиз æппæтуæрæсеон конкурс «Педагогон дебют»-ы. Хорз зоны, сывæллæтты ахуыр кæнынмæ куыд сцымыдис кæнæн ис, уый. Ахæм ахуыргæнджыты фæрцы скъола равдыста хуыздæр бæрæггæнæнтæй иу.
Камбилеевскæйы скъолайы ахуырдзауты спортивон æнтыстдзинæдтæ æдзухдæр вæййынц æмбæлгæ æмвæзадыл. Афтæ, фарон архайдтой республикæйы сæргълæууæджы кубок райсыны ерысты æмæ систы фыццæгтæ. Ацы аз та сывæллæттæ хъазыдысты турнир «Сæрак пурти»-йы æмæ рацыдысты æппæтуæрæсеон финалмæ.
Дегуаты Владимиры номыл 38-æм скъола горæты скъолаты *хсæн бацахста дыккаг бынат. Æмæ уый диссаг нæу. Бирæ ахуырдзаутæ свæййынц скъоладзауты æппæтуæрæсеон олимпиадæйы уæлахиздзаутæ æмæ призертæ, æвдисынц хорз бæрæггæнæнтæ иумæйаг паддзахадон фæлварæнты.
Алыбекты Эллæ куыд загъта, афтæмæй скъолаты хатдзæгтæ кæрæдзийæ чысыл хицæн кодтой. Уымæ гæсгæ иннæ аз хуыздæр суæвыны фадат уыдзæн алы ахуыргæнæндонæн дæр.
