Дыккаг аз цæуы Хъазаны
7 архайæджы æмæ 3 эксперты нæ республикæйы номæй архайдзысты чемпионат «Абилимпикс»-ы, сæрмагонд æфсæддон операцийы ветерантæн. Дыккаг аз цæуы Хъазаны. Ерыстæ райдайдзысты 26-æм июны. Цæгатирыстойнаг конкурсанттæ æвдисдзысты сæ зонындзинæдтæ 7 компетенцийы. Се хсæн: вокал, хæринаггæнæг, электромонтаж æмæ афтæ дарддæр. Не мзæххонтæ активонæй цæттæ кæнынц сæхи. Сæ зæрдæ дарынц уæлахизыл. Чехойты Фатимæ радзурдзæн бæстондæр.
Сергей Авадимовы зарæг хуымæтæг сфæлдыстад нæу, фæлæ фадат хи истори радзурынæн. Сæрмагонд æфсæддон операцийы архайæг Цæгат Ирыстоны кад хъахъхъæндзæн чемпионат «Абилимпикс»-ы компетенци «Вокал»-ы. Уацмыстæ сты йæхи фыст. Дзуры æфсæддон фæндæгты, хæстон хæлæртты æмæ райгуырæн зæххмæ уарзондзинадыл. Чемпионаты размæ Сергей зарыд æрмæст бинонты æмæ хæлæртты *хсæн. «Фыдыбæстæ хъахъхъæнджыты» фонды йæ куы бафарстой, конкурсы архайын йæ бон у, æви нæ, зæгъгæ, уæд уыцы бон дзуапп нæ радта. Ныр ын бæлвырдгонд у: йæ зарджытæ йын хъуамæ фехъусой адæм.
Руслан Бимбасов бæстæйы истори раздæр ахуыр кодта чингуытæй, фæстæдæр та йæхæдæг сси йæ хай. Историйы ахуыргæнæг, сæрмагонд æфсæддон операцийы архайæг йæхи цæттæ кæны йæ фæлтæрдтæ компетенци «Хæринаггæнæджы» равдисынмæ. Историмæ уарзондзинад æм сæвзæрд йæ фыды фыд, Фыдыбæстæйы Стыр хæсты ветераны руаджы. Ныр Руслан фæлвары ног дæсныйад райсын — экспертты размæ рахæсдзæн хæринаджы дыууæ хуызы. Зондамонджыты ныхæстæм гæсгæ, архайæг у бæрнон адæймаг, нæ дзы ирвæзынц лыстæг хабæрттæ, тырны алцыдæр кæронмæ æххæст кæнынмæ.
Компетенци «Электромонтаж»-ы республикæйæ архайдзæн 50-аздзыд Боциты Тотраз. Сæрмагонд æфсæддон операцимæ ацыд бархийæ, ног профессионалон къæпхæнмæ схизын дæр йæхи бафæндыд. Чемпионаты фыццаг хатт нæ архайдзæн. Йæ зондамонæгимæ сарæзтой лæмбынæг æркаст раздæры фæлтæрддзинадæн, сæхи хуыздæр бацæттæ кодтой æмæ ныр æууæндынц уæлахизыл.
Сæрмагонд æфсæддон операцийы архайджытæн «Абилимпикс» йæ профессионалон дæсныйады арæнтæй рагæй фæуæрæхдæр, сси сын конкурсæй егъаудæр хъуыддаг. У фадат царды ног сыф байгом кæнынæн, хъæугæ фæлтæрдтæ райсынæн, зæрдæмæ хæстæг дæсныйад ссарынæн æмæ та хи стыр къорды уæнг банкъарынæн.
Ацы аз Цæгат Ирыстоны кад чемпионаты Хъазаны хъахъхъæндзысты сæрмагонд æфсæддон операцийы авд архайæджы. Алчидæр сæ ерыстæм абалц кæндзæн йæхи историимæ. Архайджыты иу кæны уæлахизмæ тырнындзинад, фæнды сæ равдисын, адæймаджы тых æрмæст хæсты кæй нæ рабæрæг вæййы, фæлæ сабыр царды дæр.
