Йæ сценаритæм гæсгæ ист æрцыдысты 20 документалон æмæ аивадон кинонывы
Уæззау низы фæстæ, 80 аздзыдæй йæ цардæй ахицæн драматург, сценарист æмæ журналист Гутъынаты Владимир. Йæ сценаритæм гæсгæ ист æрцыдысты 20 документалон æмæ аивадон кинонывы. Йæ фыццаг æмæ сæйраг æнтыстдзинадыл банымайæн ис – Ирыстоны цæрджыты уарзондæр комеди «Сюрприз». Йæ режиссер у Бырнацты Измаил, æмæ йæ систой Цæгат Ирыстоны кинохроникæйы студийы. Аивадуарзджытæ тынг æнхъæлмæ кастысты, кинонывы дыккаг хаймæ. Æмæ йын Владимир ныффыста сценарий. Фæлæ йæ тынг нæ фæндыди, цæмæй йын экранизаци уа, уый. Уымæн æмæ йæ фидарæй уырныдта, уыцы æнтыстдзинад сфæлхат кæнын нæ бантысдзæн. Гутъынаты Владимир ма у зындгонд киноныв «Тэли и Толи»-йы сценарийы автор. Уæвгæ та уыд бирæвæрсыг курдиаты хицау. Ныффыста 6 пьесæйы. «Путь воина», «Психи, за мной!», «Костыль для лондонского квартала» æмæ æндæртæ æвæрд æрцыдысты театралон сценæйы. Уыд ма публицистикон уацты автор. Фæлæ аивæдты ахсджиагдæрыл нымадта кино. Фæстаг куыстытæй иу – Калоты Виталийы хъысмæтыл фыст документалон кинонывы сценарий «Барабаны судьбы».
