Йæ курдиат рæдауæй лæвар кодта бæстæйы хуыздæр сценæты
85 азы рацыд, Уæрæсейы æмæ Цæгат Ирыстоны адæмон артисткæ, ирон оперон сценæйы примæ Билаонты Долоресы райгуырдыл. Йæ курдиат рæдауæй лæвар кодта бæстæйы хуыздæр сценæты. Йæ уарзон куыстæн снывонд кодта 60 азæй фылдæр. Йæ уарзон Ирыстон та нæ баивта Стыр театрыл дæр. Аивадуарзджытæ Долоресы хъуыды кæнынц æмæ уарзынц, йæ аритæ хъарынц зæрдæйы арфмæ. Хуыцауæй лæвæрд курдиат баиу адæймаджы рæсугъдæр фæлгонц æмæ удыхъæды миниуджытимæ. Куыдæй йæ бахъуыды кодтой йæ хæлæрттæ æмæ æмкусджытæ, уый тыххæй радзурдзæн Касаты Наирæ.
Йæ хъæлæс фæндаг ссардта аивадуарзджыты зæрдæтæм. Билаонты Долорес. Оперон зарæггæнæгæн æнæрлæугæ къухæмдзæгъд кодтой бæстæйы сæйрагдæр театрты. Йе сфæлдыстадæн ын æгæрон аргъ кодтой æрмæст аивадиртасджытæ нæ, фæлæ æцæг профессионалтæ. Долоресы курдиат хуыцауы лæварыл нымадта Советон Цæдисы адæмон артист Иосиф Кобзон дæр. Иумæ сæ баста æрмæст музыкæ нæ, фæлæ фæлмæн хæлар ахстдзинæдтæ.
Хуыдтой йæ Стыр театрмæ, йæ дуæрттæ йын уæрæх байгом кодта бæстæйы цæгатаг сæйраг горæт дæр. Фæлæ Билаонты Долорес æгæрон уарзтæй уарзта йæ райгуырæн Ирыстон, æмæ дзырд радта, кæй йæ нæ баивдзæн, уымæй. 35 азæй фылдæр сæйраг партитæ кодта Музыкалон театры. Хъæздыг удыхъæд æмæ миддунейы хицау æгæрон уарзтæй уарзы йæ райгуырæн зæхх æмæ йе мзæххонты, афтæ йæ хонынц йемæ чи куыста, стæй йæ чи зыдта, уыдон.
Долорес концерттæ лæвæрдта республикæйы æппæты дæрддзæф хъæуты дæр. Йæхæдæг дæр райгуырди хæххон хъæуы, гæнæн ис, æмæ йын уыцы концерттæ уый тыххæй уыдысты уæлдай зынаргъдæр, куыд мадæлон æвзагыл зырджытæ дæр.
Дауыраты Эдуардæн Долорес уыди ахуыргæнæг дæр, стæй æгæрон æххуыс кæмæй æнкъардта, ахæм адæймаг дæр. Иумæ зарыдысты оперæ «Пиковая дама»-йы сæйраг партитæ, стæй иу, дыууæ бинонтæй сæмбырд сты иу стъолы уæлхъус. Адæймаджы уырнгæ дæр нæ кæны, не хсæн 13 азы кæй нал ис, уый. Йæ зæрдыл лæууы Цæгат Ирыстоны композиторты Цæдисы сæрдар Махъоты Ацæмæзæн дæр.
Йæ аивадæн ын æгæрон аргъ чи кæны, уыдоны зæрдæтæй абон дæр нæ хицæн кæны Долоресы хъæлæс. Оперон примæ йæ уарзон Ирыстонæн балæвар кодта хъæздыг культурон бынтæ. Аивæдты училищæйы йын йæ номыл байгом кодтой мемориалон фæйнæг. Бафидар æй кодтой, цы кабинеты куыста, уый дуарыл. Мемориалон æвдисæндары автор у йæ фырт Хайты Ибрагим.
Фæйнаг аивгонд у зындгонд зарæггæнæджы фæлгонцæй. Фæлмæн цæстæнгас æмæ мидбылхудт. Оперон зарæггæнæг бирæ азты снывонд кодта фæсивæдимæ куыстæн. Бирæты дзы ахуыдта аивæдты дунемæ, байгом кодта, абон дунеон культурон фæзты сæхи чи базонын кодта, ахæм æгæрон курдиæттæ. Мемориалон фæйнæг байгом кодтой Долоресы фырт æмæ хойы хъæппæрисæй.
Мемориал байгом кæныны фæстæ Билаонты Долоресы хиуæттæ æмæ хæлæрттæ йын йæ цыртдзæвæныл сæвæрдтой дидинджытæ æмæ веноктæ.
