Ацы аз та фæнд кæнынц республикæйы мин контрактæй фылдæр бафыссын
95 социалон контракты бафыстой ивгъуыд аз Дыгуры районы. Ацы аз та фæнд кæнынц республикæйы мин контрактæй фылдæр бафыссын. Радих сын кодтой 232 милуан сомæй фылдæр. Финансон æххуыс чи райста, уыдоны хсæн æгъуызарты Анжелæ дæр. Уый фæрцы байгом кодта флористикæйы студи. Республикæйы Хицауады æмбырды программæмæ гæсгæ дидинджыты дукани бабæрæг кодта фæллойы æмæ социалон рæзты министр Айдарты Алинæ. Куыд загъта, афтæмæй социалон æххуыс тынг ахадгæ у райдайгæ амалхъом адæмы хсæн. Æнæниздзинадхъахъхъæнынады министр Тебиаты Сослан та сбæрæг кодта Дыгуры районы рынчындоны æмæ поликлиникæйы куыст. Аныхас кодта дохтыртимæ æмæ пациенттимæ. Ведомствойы разамонæг куыд загъта, афтæмæй хъармгæнæн сезон цæуы, куыд æмбæлы, афтæ. Уæдæ хостæй дæр цух не ййафынц. Бынæттон поликлиникæ эксплуатацийы лæвæрд æрцыд 2022-æм азы. Хъæууон хæдзарады министр Къусраты Алан бабæрæг кодта бынæттон кооператив. Кæнынц дзы стурвосы куыст. Хъæууонхæдзарадон куыстуат дыууæ хатт райста грант. Уыцы фæрзæтæй фæуæрæхдæр кодтой сæ хъомыс. Хицауады æмбырды программæмæ гæсгæ ма Дзанайты Барис бабæрæг кодта Дур-Дуры 2-æм скъола дæр. Ацы аз дзы райдайдзæн дыууæазон егъау рацарæзт. Федта ма Дигорайы сквер дæр. Йæ территоримæ йын базылдысты федералон проектмæ гæсгæ. Уымæй дарддæр премьер федта, 27 бинонтæн ног фатертæ. Кæлæддзаг хæдзæрттæй ногтæм раивдзысты 98 адæймаджы. Уæвгæ Дыгуры район дыууæ азы хатдзæгтæм гæсгæ зынгæ къахдзæфтæ акодта размæ. Паддзахадон программæтæ æмæ национ проекттæ æххæст кæнгæйæ, районы рæзтæн радих кодтой 2 миллиарды æмæ 500 милуан сомы. Фæрæзтæ схардз кодтой инфраструктурæйы объектты модернизацийыл.
