Ахуыргæндты центрон хæдзары равдыстой Уæрæсейы наукæты академийы æвзагзонынады институты ирайнаг æвзæгты секторы специалистты архайды хатдзæг
Абайты Васойы ирон æвзаджы историон-этимологон дзырдуаты дыккаг томы презентаци, англисаг æвзагмæ тæлмацгондæй, уыд Мæскуыйы. Ахуыргæндты центрон хæдзары равдыстой Уæрæсейы наукæты академийы æвзагзонынады институты ирайнаг æвзæгты секторы специалистты архайды хатдзæг. Фыццаг том англисаг æвзагыл рауагътой 2020-æм азы. Презентацийы ма равдыстой дзырдты интерактивон картæйы электрон хуыз. Уый ахсджиаг у, уымæн æмæ ныр дзырдуатæй пайда кæнын уыдзæн глобалон информацион тыгъдады. Ацы хъуыддæгтæ царды рауагътой профессор Торчынты Амырханы хъæппæрисæй. Дыккаг том тæлмацгæнгæйæ специалистты хъæппæрисадон къордмæ, сæ сæргъы Олег Беляев, афтæмæй, сæвзæрд фæнд онлайн-базæ саразын, цæмæй йæ фæрцы æнцонæй уа ссарын дзырды нысаниуæг. Ныртæккæ дыккаг том уагъд у чысыл тиражæй, фæлæ ма иннæ азы кæронмæ фæнд кæнынц рауадзын дзырдуаты 4 хайы дæр англисаг æвзагыл. Электрон хуызæй пайда кæныны фадат та фæзындзæн ацы аз.
