Сæрмагондæй та наукон кусджытæ, æхсæнадон активисттæ
Уæрæсейы фидæн аразгæ у, фыццаджыдæр, йæ адæмæй. Абон ахсджиаг у дзурын, бæстæ размæ чи кæны, æмæ æцæг граждайнаг иудзинады дæнцæг чи æвдисы, уыдоны тыххæй. Нæ дарддæры æрмæджы хъайтартæ дæр сты, алы къабæзты æнтыстдзинæдтæ кæй къухы æфты, ахæм адæм. Сæрмагондæй та наукон кусджытæ, æхсæнадон активисттæ, Фыдыбæстæйы фидæны хъахъхъæнджытæ. Бæстондæр радзурдзæн Хъайтмазты Дзерассæ.
Цæгат Ирыстоны паддзахадон университеты иумæйаг æнæорганикон химийы кафедрæйы сæргълæууæг Сергей Скупневский бирæ азты æнтыстджынæй æмархайд кæны Склифосовскийы номыл тагъд æххуысы наукон-иртасæн институтимæ. Иумæйаг куыст æххæстгонд цæуы сæрмагонд проектмæ гæсгæ. Баст у нырыккон регенеративон медицинæимæ.
Акъоты Батраз æмæ Хæмыцаты Давид сты Адæмон фронты фæсивæдон къорды минæвæрттæ. Лæппутæ куыд зæгъынц, афтæмæй абон нæ паддзахады хъæуы æнгом æхсæнад. Æмæ уый дæнцæг у волонтерты змæлд.
Ивгъуыд азы кæрон фæсивæдон къорды бархионтæ Краснодары крайы мазут куы акалд, уый фæстæ сæмбырд кодтой нефтепродукттæ 500 голладжы бæрц. Уæдæ æдзух фæархайынц Курскы облæстьмæ гуманитарон æххуыс хæццæ кæныны хъуыддаджы дæр.
Фыдыбæстæ хъахъхъæнынимæ йæ фидæн сбæттын фæнд кæны Огъуаты Максим. У Цæгат Кавказы суворовон æфсæддон училищæйы курсант æмæ хæстон династийы минæвар. 30-æм апрелы рухстауæн марафон «Знание»-йы Максим аныхас кодта Уæрæсейы Президент Владимир Путинимæ æмæ йын радзырдта йæ училищæйы тыххæй. Ацы балц райдыдта конкурс «Наукæмæ къæпхæн»-æй. Уæд лæппу бацæттæ кодта йæ бинонты æфсæддонты тыххæй куыст.
Уæрæсе, фыццаджыдæр, у йæ адæм. Размæ йæ чи кæны, уыцы адæм. Уыдон сты тыхджын æмæ стыр паддзахады бындур.
