Баст у мастеры 85 азы юбилейимæ
Абон нывгæнджыты цæдисы залы байгом уыдзæн Уæрæсейы сгуыхт нывгæнæг Дзбойты Михалы куыстыты равдыст. Баст у мастеры 85 азы юбилейимæ. Дзбойты Михал нымад у Цæгат Ирыстоны курдиатджын скульптортæй иуыл. Йе сфæлдыстадон фæндаг у цымыдисаг æмæ алывæрсыг. Кæддæриддæр æй йæхимæ æлвæста йæ райгуырæн бæстæйы рæсугъддзинад. Йæ куыстытæ суанг систы нæ республикæимæ зонгæ кæныны ахсджиаг фæрæзтæ. Зæгъæм, Фыдыбæстæйы Стыр хæстæй чи нал сыздæхт, уыцы Цæгат Ирыстоны педагогон институты студенттæн æмæ ахуыргæнджытæн цыртдзæвæн. Уæдæ хицæн ныхасы аккаг у цуанæтты æмæ цæрæгойты бардуаг Æфсатийы цыртдзæвæн дæр. Ис Цъæйы коммæ бацæуæны. Дзæуджыхъæуы та дисы фтауынц Цæнгæт хиды стайты скульптурæтæ, стæй Суворовы бюст Дзæуджыхъæуы суворовн училищæйы. Зындгонд сты æндæр хæстон монументтæ Лескены æмæ Мызуры, Къостайы цыртдзæвæн Хъарман-Сындзыхъæуы, Сергей Кировæн – Дзæуджыхъæуы, Дубининты бинонтæн – Мæздæджы. Экспозицийы ма сты, алы азты конд чи рцыд, уыцы портреттæ æмæ цыртдзæвæнты проекттæ. Баст сты Ирыстоны историимæ, нарты кадджытимæ.
