Цæгат Ирыстоны ис, наукæйæ чи архайы, бирæ ахæм куыстуæттæ æмæ организацитæ
Абон у Уæрæсейы наукæйы бон. Нысангонд æрцыд 1999-æм азы. Цæгат Ирыстоны ис, наукæйæ чи архайы, бирæ ахæм куыстуæттæ æмæ организацитæ. Уыдонæй иу у Уæрæсейы наукæты академийы Дзæуджыхъæуккаг наукон центр. Йæ хыгъды чырæгты технологийы лаборатори кæны цымыдисаг æмæ ахсджиаг куыст. Бæлвырддæр нæ дарддæры æрмæджы.
Сæкæрнизы æвзæр фæстиуджытæ адæймаджы æнæниздзинадыл куыд ма фæзыной – ацы фарстайыл кусынц æппæт дунейы ахуыргæндтæ. Уæрæсейы наукæты академийы Дзæуджыхъæуккаг наукон центры чырæгты технологийы лабораторийы дæр ацы хъуыддагыл архайынц. Кусджытæ бафæлвæрдтой чырæгтæ исыны æмæ сæ бирæкæныны æппæт гæнæнтæ. Стджыты магъзы чырæгтæ ис алы адæймаджы буары дæр æмæ сæ гæнæнтæй ис спайда кæнын организм сног кæнынæн.
Куыст æххæстгонд цæуы буары æдде. Бирæконд стæджы магъзы чырæгтыл аразынц сæкæрнизæн уавæртæ, уый фæстæ сæ специалисттæ бафæлварынц сног кæнын, зæгъæм, фитокомплекстæй кæнæ та æндæр хуызы. Лабораторийы кæстæр наукон кусæг Алтынбек Ислаевæн биохимиимæ базонгæ наукон къорды. Разамынд ын лæвæрдта Кокайты Ромеш. Лæппуйæн наукæ йæ сабибонтæй уыд цымыдисаг.
Чырæгты технологийы лаборатори байгом 2019-æм азы. Кусæнгæрзты уникалон комплекс дæтты, чырæгты культурæ æвзарыны, бирæкæнын сæ, сæ рæзтмæ цæст дарыны æмæ иртæстытæ кæныны фадат. Наукон куыстытæ мыхуыргонд æмæ æвдыст цыдысты конференциты.
Чырæгты культурæимæ кусынц 4 адæймаджы – 2 фæлтæрдджын æмæ 2 æвзонг иртасæджы. Алкæйдæр сæ ацы дæсныйадмæ æрбакодта иртасæн цымыдисдзинад, æмæ фылдæр скæныны фæндон.
Наукæ у энтузиастты хъуыддаг. Æмæ ацы лабораторийы кусджытæ уымæн сты æвдисæн.
