Се ргом здæхтой менюмæ, хæринæгты хæрзхъæддзинадмæ, санитарон домæнтæм, стæй æмбæлгæ кусæнгæрзтæй куыд æххæст сты, уымæ
Адæмон фронты эксперттæ аргъ скодтой скъоладзауты лæвар тæвд хæринагæй æххæст кæныны хъуыддаг цы уавæры ис, уымæн. Се ргом здæхтой менюмæ, хæринæгты хæрзхъæддзинадмæ, санитарон домæнтæм, стæй æмбæлгæ кусæнгæрзтæй куыд æххæст сты, уымæ. Цавæр хатдзæгтæ скодтой, уый тыххæй
Фыццаг, дыккаг, æртыккаг æмæ компот. Стæй фæткъуы, цæмæй сывæллоны витаминты æвæрд фылдæр кæна. Республикон физикон-математикон лицей-интернаты сæ хъомылгæнинæгтæн тæвд сихортæ цæттæ кæнынц хи хæрæндоны. Бынат дзы ис 150 сывæллонæн. Процесс арæзт у 4 къæпхæнæй. Фыццаг бахæрын кæнынц райдиан кълæсты ахуырдзаутæн, уый фæстæ та уæлæмхасæн къордты чи архайы, стæй бирæсывæллонджын æмæ фæкæсынхъуаг бинонтæй сывæллæттæн.
Лицей-интернаты сывæллæтты тæвд хæринагæй æххæст кæныны хъуыддаг цы уавæры ис, уымæн аргъ скодтой адæмон фронты минæвæрттæ дæр. Сæ цæст дардтой менюмæ, хæринæгты хæрзхъæддзинадмæ, санитарон домæнтæм, стæй æмбæлгæ кусæнгæрзтæй куыд æххæст сты, уымæ. Директор Франкель Магомедов алцыдæр бæлвырд радзырдта.
4-æм гимназы ахуырдзауты æххæст кæнынц тæвд аходæнтæ. Хæринæгты иу хай æрбаласынц комбинатæй, цавæрдæртæ та цæттæ кæнынц ам. Бындурон цалцæджы фæстæ хæрæндон фæпарахатдæр ис. Фæуæрæхдæр, кæмæй нæ пайда кодтой, уыцы агъуыстыты рацарæзты фæрцы.
Директор Цуциты Сослан ма куыд радзырдта, афтæмæй гимназы хæрæндоны нæй техникон кусæг. Кусджытæ кæй нæ фаг кæны, уый тыххæй адæмон фронты минæвæрттæн фехъусын кодтой иннæ ахуыргæнæндæтты дæр.
Райдиан скъолайы ахуырдзауты тæвд хæринагæй лæвар æххæст кæныны тыххæй закъон фидаргонд æрцыд 2020-æм азы. Уæдæй фæстæмæ адæмон фронты минæвæрттæ ацы хъуыддагмæ сæ цæст дарынц. Специалистты ныхæстæм гæсгæ , азæй-азмæ уавæр хуыздæр кæны.
Ахæм мониторингтæ адæмон фронты минæвæрттæ сараздзысты иннæ скъолаты, æрмæст Дзæуджыхъæуы нæ, фæлæ республикæйы районты дæр. Æппæт фиппаинæгтæ æрвыст æрцæудзысты профилон ведомствæтæм.
