Цы аиппдзинæдтæ сбæрæг кодтой, уыдоны фæдыл Адæмон фронт бацæттæ кæндзæнис амынддзинæдтæ бæрнон структурæтæм, æмæ уæд хъуамæ уавæр аива хуыздæрырдæм
Сергей Меняйло бабар кодта афæдзы кæронмæ, республикæйы социалон объектты æппæт куыстытæ фæуын. Зæгъæм, Ног Бæтæхъойы, Бирæгъзæнджы æмæ Цыколайы скъолаты сцалцæг кодтой спортивон залтæ. Фæлæ дзы физкультурæйы уроктæ кæнæн нæй. Уымæн æмæ аразджытæ сæ куысты æруагътой рæдыдтытæ. Скъолаты директортæ сæ хъаст барвыстой Адæмон фронтмæ. Активисттæ æвæстиатæй скодтой бæрæггæнæн куыст. Семæ нæ уацхæссæг Гæджиты Сослан дæр, æмæ йын бакæсæм йæ сюжетмæ.
Уæллаг Бирæгъзæнджы скъолайы æрæджы кæронмæ æрхæццæ сколайы бындурон цалцæг. Рохуаты нæ баззад спортивон зал дæр. Цалцæггæнæн куыстытæ бынтон зæрдæмæдзæугæ нæ рауадысты. Цартыл ис доны фæдтæ, дзаумæттæ ивæны та нæ сарæзтой вентиляцийы системæ. Уый тыххæй агъуыстыты кæны уымæлы тæф. Хæтæлтæ дæр куыд æмбæлы, афтæ нæ сæвæрдтой, æмæ уый тыххæй къултæ схъуына сты.
Спортзалы проектмæ нæ бахастой пъолтыл сæрмагонд хахнывтæ скæнын. Фæлæ уый физкультурæйы урочыты цыдмæ бар нæ дары. Уæлдайдæр та кусджытæ зæрдæ бавæрдтой, тагъд рæстæг аиппдзинæдтæ кæй аиуварс кæндзысты, уымæй.
Ног Бæтæхъойы физкультурæйы урочытæ нæй суанг сентябрæй фæстæмæ. Уымæн йæ аххосаг у, зал хъармгæнæн системæмæ кæй нæ баиу кодтой, уый.
Æппæты æвзæрдæр уавæр сæвзæрд Цыколайы скъолайы. Пъол бамбæрзтой æндæр æрмæгæй, æмæ йыл цæуын дæр тæссаг у. Паркет куыд æмбæлы, афтæ не слæгъз кодтой, æмæ хъæды схъистæ къахы фæныхсынц.
Уайдзæфы аккаг систы, мидæгæй цы аивгæнæн куыстытæ сарæзтой, уыдон. Кусджытæ къултæ нæ сымраст кодтой, уый тыххæй дзы фæзынд скъуыдтытæ.
Ацы спортзалтæ хъуамæ сцæттæ уыдаиккой августы. Цы аиппдзинæдтæ сбæрæг кодтой, уыдоны фæдыл Адæмон фронт бацæттæ кæндзæнис амынддзинæдтæ бæрнон структурæтæм, æмæ уæд хъуамæ уавæр аива хуыздæрырдæм.
