Сæрмагондæй, уыдысты Гагарины æмæ Хъесаты Астаны уынгты, федтой Терчы былгæрон тезгъогæнæн фæз дæр
Адæмон фронты минæвæрттæ сбæлвырд кодтой Дзæуджыхъæуы æхсæнадон зонæты уавæр. Сæрмагондæй, уыдысты Гагарины æмæ Хъесаты Астаны уынгты, федтой Терчы былгæрон тезгъогæнæн фæз дæр. Æххæстгонд дзы цæуынц аивгæнæн куыстытæ. Мониторингы тыххæй бæлвырддæр радзурдзæн Хъайтмазты Дзерассæ.
Мониторингы фыццаг объект – Гагарины уынджы, 44-æм скъолайы цур æхсæнадон территори. Ам куыстытæ æххæстгонд цыдысты 2 къæпхæнæй. Специалисттæ сæвæрдтой брусчаткæ, баивтой бордюртæ. Баззадис ма бандæттæ æмæ уынджы рухсыты системæ сæвæрын. Адæмон фронты минæвæрттæ бæлвырд кæнынц, фароны æхсæнадон хъæлæс кæныны хатдзæгтæм гæсгæ ацы аз цы зонæтæ аив кæнын райдыдтой, уыдон.
Куыстыты хæрзхъæддзинадæн аргъ скодтой Хъесаты Астаны уынджы дæр. Ацы территори аивгонд фесты. Специалисттæ сног кодтой фæндаджы уæлцъар, сæвæрдтой бандæттæ, урнæтæ, уынджы рухсытæ.
Дзæуджыхъæуы сæйраг фæлладуадзæн зонæтæй иу, Терчыбылы тезгъогæнæн фæз, хъуамæ саив кæной азы кæронмæ. Объекты цалцæггæнæн куыстытæ адих кодтой цалдæр къæпхæныл. Специалисттæ куыд загътой, афтæмæй фæндты ис, ацы фæзы æддаг бакаст иумæйаг архитектурон концепцимæ æркæнын.
Адæмон фронты минæвæрттæ дарддæр æххæст кæндзысты республикæйы æхсæнадон территориты мониторинг.
