Се сфæлдыстадон балц рауцад цымыдисаг, стæй ма сæ хæрзиуджытыл дæр бафтыдтой
Адæмон кафты ансамбль «Дети гор» архайдта Сочийы конкурсы «Arena Danс»-ы. Се сфæлдыстадон балц рауцад цымыдисаг, стæй ма сæ хæрзиуджытыл дæр бафтыдтой. Сæ курдиат равдыстой сывæллæтты 9-æм сфæлдыстадон æппæтуæрæсеон конкурсы. Æдæппæтæй дзы архайдтой 30 коллективæй фылдæр, нæ бæстæйы алы регионтæй. Сæ аивад æвдыстой кафты алы хуызты: классикон, адæмон æмæ нырыкконы. Аргъ та сын кодтой бæрнон жюрийы уæнгтæ. Се хсæн: Мæскуыйы Паддзахадон культурæйы институты минæвæрттæ, стæй зындгонд хореогрæфтæ æмæ педагогтæ. Сæхи ныхæстæм гæсгæ, уыйбæрц къордты хсæн хуыздæрты равзарын æнцон хъуыддаг нæ уыди. Се ппæт дæр равдыстой хорз цæттæдзинад. Цæгатирыстойнаг ансамбль «Дети гор» аивадон конкурсмæ бацæттæ кодта сæ репертуарæй 6 кафты. Афтæмæй алы номинациты систы конкурсы фыццæгæм, дыггæгæм æмæ æртыккæгæм къæпхæнты лауреаттæ. Саккаг сын кодтой 5 дипломы. Сфæлдыстадон æнтыстдзинæдтæй дарддæр ма æвзонг кафджытæн фадат уыд сæ фæлладуадзæн рæстæг сæхи аирхæфсынæн дæр. Чидæртæ ахæм балцы уыдысты фыццаг хатт, æмæ сæм баззад рæсугъд æнкъарæнтæ.
