Æмбырды архайдтой республикæйы дзыллон информацион фæрæзты минæвæрттæ, профилон комитеты специалисттæ æмæ Æхсæнадон палатæйы уæнгтæ
Æхсæнадон палатæйы ацыди æмбырд æмæ дзы æрныхас кодтой, мæнг хъусынгæнинæгтæй медиа-тыгъдад хъахъхъæныны æмæ ацы фарста алыг кæныны мадзæлттыл. Æмбырды архайдтой республикæйы дзыллон информацион фæрæзты минæвæрттæ, профилон комитеты специалисттæ æмæ Æхсæнадон палатæйы уæнгтæ. Ассоциаци «Хæдбар æхсæнадон мониторинджы» эксперт куыд радзырдта, афтæмæй мæнг хабæрттæ кæм парахат кæнынц, ахæм фæзтæ ис дзыллон медиа ресурсты. Æмбырды архайджытæ фылдæр æргом аздæхтой фейк-ньюс кæй хонынц, уыцы фарстамæ. Хъæуы йæм лæмбынæг цæст æрдарын. Эксперт дæнцæгæн æрхаста социалон хызты дзыллон информацион фæрæзты цы информаци парахат кæнынц, уый. Уæлдайдæр та коронавирусы æмæ Конституцимæ ивддзинæдтæ бахæссыны темæимæ цы информаци баст уыди, уый. Закъонывæрынады бакуыстой мæнг информаци парахат кæныны тыххæй механизмыл. Ам ныхас цæуы уголовон æфхæрдыл.