Хъæууонхæдзарадон кооператив «Агроюг» скуыста ацы азы райдиан, фæлæ æппæт хъомысæй нæма кусы, æмæ фæнд кæны йæ архайд фæпарахатдæр кæнын
Æнæхъæн афæдз нæ республикæйы æххæстгонд цæуынц, хъæууон хæдзарады рæзтæн ахъаз чи уыдзæн, ахæм программæтæ. Хъæууонхæдзарадон кооператив «Агроюг» скуыста ацы азы райдиан. Фæлæ æппæт хъомысæй нæма кусы, æмæ фæнд кæны йæ архайд фæпарахатдæр кæнын. Цавæр нысантæ ма сæм ис, уый тыххæй бæлвырддæр радзурдзæн Фидараты Маринæ.
Грантты æххуысы фæрцы рахизын райрæзты фæндагмæ. Цæгат Ирыстоны хъæууон хæдзарады æмæ хойраджы министры хæдивæг бабæрæг кодта Горæтгæрон районы дзидзайы куыстгæнæг цех. Куыстуат фæзынди ацы азы райдиан, æмæ сси, грант чи райста, ахæм егъау инвестицион проекты иу хай.
Ныртæккæ цехы уадзынц дзидзайы продукцийы 100 хуызы. Нырыккон кусæнгæрзтæ фадат дæттынц процесс автоматизацийы хуызмæ раивынæн. Афæдзмæ та цехы разамындæн бантыст фæлхасгæнджыты хыгъд сбæлвырд кæнын.
Ныртæккæ уал ног куыстуат æппæт хъомысæй нæ архайы, кусы æрмæстдæр йе 30 проценты. Фæлæ сын фадæттæ та дзæвгар фылдæр ис. Инвестицион проекты минæвæрттæ сæ фидæны архайдыл æрныхас кодтой хъæууон хæдзарады æмæ хойраджы министры хæдивæг Рубайты Ибрагимимæ.
Инвестицион проекты дыккаг къæпхæн æххæст кæнгæйæ, Мæздæджы районы арæзт æрцæудзæн æхсыры куыстгæнæг завод. Нысан æй кæнынц 2021-æм азы скусын кæнын.
